Шкетан театрын «Кеҥеж тургым» проектше умбакыже шуйна. 12 июньышто артист-влак Юл кундемысе Карай ялыште «Кеҥеж йӱд» музыкальный комедийым модын ончыктышт.
Тиде гана декорацийлан тошто школ ончылнысо кумдыкым ойырен налме. Тошто оралтым ялысе «клубыш» савыраш нелылыкше уке ыле. Ончышо-влаклан шичме верымат ятырак ямдылыме. А тудыжо ты гана вич шӱдӧ лишке погынен. Нуно Волжский район да ола гыч веле огыл, пошкудо Морко, Провой… кундем гычат лийыныт. Йошкар-Ола гыч мийышат ыльыч. Адакше ты кечын тыште Юлсер кундем Пеледыш пайремым пайремлен. А пайремлан уна-влак тӱрлӧ вер гыч толыт. Южо еҥже Шкетан театрын модмыжым икымше гана ужын. Вет Юлсер кундем гыч шукынжо школ деч вара Казаньыш тунемаш, пашаш каят. Марий театрым ончаш лӱмын Йошкар-Олаш толман…
Тиде проект почеш кумшо спектакль ыле. Икымше гана, Шернур кундем Чылдемыр ялыште модмо годым артист-влаклан йӱр йымалнат чывылгаш логале гын, ты гана игече мелын лийын. Каваште лапчык-влак ийыныт, но тунамак кече лектын, шыратен да шыматен ончалын. Спектакль тӱҥалмеке, кече эркын волен, ӱжарам чевертен, каватӱр шеҥгеке шыле. А кас умырым пӱчкын, спектакльысе герой-влакын мурымышт торашке шергылтын, векат.
Артист ден ончышо-влак ик шӱлашан ыльыч. Чынжымак, пӱртӱс аланыште спектакль йӧршеш вес семын ончалтеш. Тудым илышыште чын лийше сӱрет семынак ончет. Артист-влакын ойлымыштлан «зал» гыч вашештышат, куштымо сценылаште кушташ лекшат ыльыч. Спектакльын содержанийже иктак гынат, тудо кажне гана тӱрлын лектеш. Ты гана кажне артистше уло чонжым пыштен модо. Тидын нерген ончышо-влак соцкылысе лаштыклаштат палемденыт.
Шкетан театрын кеҥежымсе тургымжым ончалаш, К.Иванов лӱмеш Чуваш академический драме театрын вуйлатышыже Е.В.Николаева шке еҥже-влак дене толын ыле. Коллегына-влаклан тиде проект пеш келшен, нуно шкешт дене тидым илышыш шыҥдараш кумылан улмыштым ойленыт.
Калык дене тыгай вашлиймашым эртараш район округ вуйлатыше, культур отдел, верысе администраций, предприниматель-влак полшеныт. Кугу таум школ директор Любовь Анатольевна Сергеевалан ойлыман. Тудо чыла шотыштат йӧным ыштен шоген.
Сай паша кужу ӱмыран, маныт. Юлсер кундемысе калык ончыкыжат шке декыже толаш ӱжын, совым кужу жап кырен чеверласен.
26 июньышто М.Шкетан лӱмеш Марий драме театр Морко район Унчо ялыште «Кавасе алаша» спектакльым модаш тӱҥалеш. Тугеже, угыч вашлиймешке, манына.
