18, 19 декабрьыште Шкетан театр шке ончышыжлан У ий пӧлекым ыштыш – сценыш «Ший Пампалче» марий мюзиклым лукто. Йомак тӱня тӱрлӧ тӱсан тул дене волгалте, мотор Ший Пампалчын оҥгыр гай йӱк дене муралтыме сылне мурыж дене темын йоҥгалте. Залыште шинчыше-влак шке кумылыштым совым кырыме гоч раш почыч.
Драматург, Марий Элын калык артисткыже Зинаида Долгова марий еҥлан изи годсек сайын палыме «Ший пӱян Ший Пампалче» калык йомакыш оҥай персонаж-влак дене ешарен, поро вийын осал ваштареш кучедалмыж нерген драматургий произведенийым ыштен. Тыге Вӱдонын ик полышкалышыже Вувер кува деке эше Турий, тудак Кӱчызӧ, Озыркан Мардеж ешаралтыныт. Ший Пампалче ден ачаже Паймет пӱртӱс дене келшен, тудым аралаш тыршен илат. Неле жапыште нуныланат полыш кидымат лач пӱртӱсын шочшыжо-влак: Пызле, Куэ да Тумо, Лай Мардеж — шуялтат. А юзо виян ший товар марийлан аралтышым ышта гын, осалым когартен йӱлата.
Поэтесса Зоя Дудинан почеламут корнылаже действийым вияҥдаш, образ-влакым келгемдаш полшат. Нуным сем дене композитор Светлана Яндукова чонаҥден.
Спектакльын декорацийже – чылт юзо тӱня. Тиде тӱням художник Сергей Таныгин ден компьютер дизайнер Андрей Искандаров «чоҥеныт». А вес художник – Лариса Воробьева – герой-влаклан сылне вургемым чиктен. Куштымаш-влакым Андрей Дмитриев шынден.
Йомак негызеш марий мюзиклым ямдылаш театрын директоржо Эрик Юзыкайнын шонымашыжым илышыш тӱҥ режиссер Роман Алексеев шыҥдарен. Тыге чоным вӱчкышӧ, кумылым лывыртыше, моткоч мотор паша сценыш лектын. Но тиде сылныже артист-влак деч посна ок лий ыле. Тӱҥ образ-влакым теве кӧмыт чоҥеныт:
Ший Пампалче -арт. М.Воронцова, Марий Элын кал. арт. С.Строганова; Вӱдон — Марий Элын сулло арт. Э.Яковлев, арт. А.Сандаков;
Вувер кува — Марий Элын сулло арт.-влак С.Сандакова ден М.Почтенева; Турий, тудак Кӱчызӧ — арт. И.Соловьев;
Паймет — РФ-н сулло арт. И.Смирнов, Марий Элын кал. арт. С.Данилов.
Тӱшка сценылаште пӱтынь труппо модеш.
Светлана Пехметован мюзикл нерген шонымашыже.
