Шекспирын Гамлетше марла ойла

6 октябрьыште М.Шкетен лӱмеш  театр черетан у тургымым «Гамлет. Машина. Цемент»  спектакль дене почо. Тиде у постановкышто режиссер С.Пектеев У.Шекспирын «Гамлет» пьесыже ден Ф.Гладковын «Цемент» романжым иктеш ушен.

У.Шекспирын черетан произведенийже негызеш спектакльым ямдылаш тӱҥалме «Гамлет» трагедийым марлаш кусараш сай амал лийын. Тиде суапле сомылым кӱчык жапыште Василий Пектеев ден Анатолий Мокеев шуктеныт. Да пьесым шукерте огыл театр посна книга дене савыктен луктын. Тиде у книга дене   спектакль тӱҥалме деч ончыч калыкым палдарыме.

Кум актан у спектакльым шындымыж  дене режиссер семын Степан Пектеев Йошкар-Оласе ончышым адакат  у формо дене ӧрыктарыш. Тӱнямбал да руш классический, тӱрлӧ жапыште возымо, тӱрло темым тарватыше нине произведенийым молан кӧра ик постановкыш ушымо – теве мо шотышто эн ончычак йодыш шочеш залыште шинчышын. Да тудо ты йодышлан вашмутым кычалаш тӱҥалеш,  сценыште мо ужмым уэш да уэш ушыштыжо пӧрдыктылаш, чон шижмашыжым умылаш тыршаш тӱҥалеш…

Черетан пашаште артист-влак эше ик гана шке мастарлыкышт дене ӧрыктарен куандарышт. Гамлетын рольжым Алексей Тетерин, Офелиям Светлана Александрова, Корольым РМЭ-н сулло артистше Эдуард Яковлев, Королевам РМЭ-н калык артистше Светлана Строганова модыт. Лаэртын образыштыже Иван Соловьев ӱшандара.

Спектакль декораций шотышто ойыртемалтше. Мутлан, автомашина салонышто улшо сӱретым кӧргӧ гыч камерыш возен, вигак экраныш лукмо действийым ончышо деке утларак лишемда, герой-влакын шижмашыштым келгынрак умылаш полша.

Персонаж-влак кок йылме дене мутланат. Каласыман, «Гамлет» марла моткоч чаплын да умылаш лийшын йоҥга. Вес йылман ончышылан титр полша.

Тыгеракын, у тургымым почмо. Тек тудо тӱвырго лектышан лиеш.

Поделиться ссылкой:

© Шкетан театр - 2022

Top