«Салика» спектакльым икымше гана сценыште 85 ий ончыч, 1938 ий 5 апрельыште, модмо. Самырык автор Сергей Николаев тӱҥалтыште шке пьесыжым «Полатовын сӱанже» манын лӱмден. Но тудым шындаш ямдылыме годым вуймутшо «Саликашке» савырнен. Режиссержо – икымше профессионал марий режиссер Алексей Маюк-Егоров. Чаманен каласаш логалеш, тиде Алексей Ивановичын «йӱксӧ мурыжо» лийын- «калык тушман» семын тиде ийынак октябрьыште лӱен пуштыныт.
А «Салика» музыкальный комедий таче кече мартеат ила, сценыш 900 утла гана лектын. Икымше гана шындыме деч вара сюжетше вашталтын огыл манаш лиеш. Тӱҥалтыштак пеҥгыде кышкарыш шындыме дене тудо ик татланат шолдырген огыл. Таче марте латкум постановко лийын. Калык тудым йӧратен онча. А артист-влаклан «Саликаште» модаш – кугу чап. Тыште изи ма кугу роль лийже – кажне персонажше шкешотан да ойыртемалтше, шарналт кодшо, шыргыжалаш таратыше я шинчавӱдым лукшо.
9 апрельыште сценыште модмо «Салика» музыкальный комедий шке шочмо кечыжлан пӧлеклалтеш.