Тиде кечылаште театрыш куанле увер тольо. Артистке Светлана Сандаковалан Марий Эл Республик Вуйлатыше А.А.Евстифеевын 140-ше номеран Указше дене «Марий Эл Республикын калык артистше» чап лӱмым пуымо.
С.Сандакован пӱтынь усталык корныжо М.Шкетан лӱмеш Марий национальный драме театр дене кылдалтын. 1998 ийыште М.Щепкин лӱмеш кӱшыл театр училищым тунемын пытарыме деч вара сценыште шуко оҥай да келге рольым чоҥен. Кажнышкыже тудо келгын пура, шке героиньыжым умылен да шижын модмыж дене ончышым ӱшандарен кертеш. Тудо – Йыван Кырла лӱмеш театр (1999), Марий Эл Республикын М.Шкетан лӱмеш кугыжаныш премийже-влакын (2007) лауреатше. 2013 ийыште «Марий Эл Республикын сулло артистше» чап лӱм дене палемдалтын.
Коллектив да ончышо-влакын лӱмышт дене Светлана Викторовнам чапле лӱм дене шокшын саламлена да усталык корныштыжо эшеат кугу кӱкшытыш шуаш тыланена. Ӱшанена, эн сай рольжо тудын эше ончылно.