Тидын нерген шуко возышна, кутырышна, ончыктышна. Тиде жап толын шуо – 5 да 6 февральыште М.Шкетан театрын сценыштыже артист-влак Уильям Шекспирын «Укрощение строптивой» пьесыж почеш шындыме «Торешвате» спектакльым модыч. Тиде кок кас ончышо-влакланат, театрын усталык коллектившыланат пайрем дене иктак ыле.
Шекспир адакат марий йылме дене моткоч сылнын йоҥгалте. Марий Элын калык поэтше Семен Николаевын коло ий утла ончыч кусарыме поэзий саскаже сценыш лекмым вучен шуктыш. Комедийым режиссер-постановщик Роман Алексеев шынден. Тудын шонымыжым илышыш пурташ художник-постановщик Сергей Таныгин, вургем сӱретче Лариса Воробьева полшеныт. А сем дене спектакльым Валерий Кульшетов сӧрастарен. Нунын тыршымышт дене ончаш да колышташ мотор, чоным кандараш да шонкалаш таратыше у паша шочын.
Журналист-влак дене ик вашлиймаште «А молан «Торешвате» спектакльым ончаш кулеш, шонеда?» йодышлан ик актёр вашештыш: «Да кеч пытартыш сценыште тӱҥ героиньын монологшым колышташлан кӧра». Теҥгечсе тореш товар гай руышо, а таче Петруччон ватыже лийше Катаринан марийым, поръеҥым аклен ойлымыжо, тудым элым аралыше салтак дене таҥастарымыже, шинчавӱд лекме марте чоныш вита. Лач тыште пьесын тӱҥ шонымашыже. Таклан огыл Шекспирым теве ынде ныл курым сценыште тӱня мучко модыт. Тудо айдеме тукымым кеч-могай жапыште тургыжландарыше йодышым тарватен.
Тӱҥ роль-влакым кок состав ямдылен. Катаринам самырык актрисе Светлана Александрова ден Марий Элын калык артисткыже Светлана Строганова, Петруччом Марий Эл кугыжаныш премийын лауреатше Павел Ефимов ден Марий Элын сулло артистше Асмаев модыт. Кок мужыржат шке семын образым чоҥат, кажныже шке семынже оҥайын ончалтеш.
Тыгеракын, Шкетан театрын репертуарже эше ик чапле паша дене пойдаралте.
