13 октябрьыште марий тӱня шкенжын чыла шотыштат кугу талантан, кӧргӧ чонжо дене патыр да виян, ушан-шотан, кугу шинчымашан, келге тӱняумылымашан эргыжым пытартыш корныш ужатыш. Тудын лӱмжӧ – Пектеев Василий Алексанрович, Санян Вачи. Марий Эл искусствын сулло деятельже, И.Палантай лӱмеш Марий Эл кугыжаныш, Йыван Кырла лӱмеш театр премий-влакын лауреатше, М.Шкетан лӱмеш Марий драме театрын художественный вуйлатышыже. Тудын чапле пашажым «За заслуги перед Марий Эл», «За труды в культуре и искусстве» орден-влакын медальышт дене палемдыме. В.Пектеев уло ӱмыржым марий профессиональный театр искусствым пойдарышашлан да вияҥдышашлан пӧлеклен. Ӱмыржӧ мучко шочмо марий калыкшым, тудын йылмыжым, ойпогыжым, профессиональный культуржым арален кодышаш да кӱшкырак нӧлталшаш верч шӱм-чонжо дене йӱлен тыршен.
Тиде кечын Василий Пектеев пытартыш гана аншлагым, зал тич калыкым чумырыш. Тылеч ончыч кастене артист-влак тудын тений сценыш лукмо «Колумб» спектакльжым модыч.
А сценыш кӱзен, пытартыш мутым, ешыжлан, пелашыже Нина Николаевналан, Дима ден Степан эргыштлан, родо-тукымжылан чаманымашым ойлаш кумылан еҥ моткоч шукын улыт ыле. Кажныже тудым эн ончычак кугу профессионал семын аклен, марий театр, марий искусство тӱня тичмаш налмаште виян еҥым йомдарен манын палемден. Тиде Марий Эл Кугыжаныш Погын вуйлатыше М.З.Васютин, Марий Эл правительство вуйлатышын алмаштышыже, Марий Элын культур, печать да калык-влакын пашашт шотышто министр Иванов К.А. лӱм дене тудын алмаштышыже М.И.Матвеев, «Йошкар-Ола» ола округ вуйлатышын полномочийжым жаплан шуктышо Е.П.Кузьмин лийыныт. Коллегыштым эн порын шарналтеныт режиссер-влак О.Г.Иркабаев (Марий ТЮЗ) ден В.Г.Константинов (Руш драме театр). Лӱмын чеверласаш толыныт Чуваш академический театрым вуйлатыше Николаева Е.В., Калмык национальный театрын художественный вуйлатышыже Манджиев Б.Н., Мордва калык писатель, драматург Пудин А.В., Марий Элын ончычсо культур министрже, М.Шкетан лӱмеш Марий театрын ончычсо директоржо Николаев В.Л. Яковлева Л.Н. ден Александров Э.В. Марий мер каҥаш вуйлатыше семын В.Пектеевын икымше Оньыжа лиймыже да тиде толкыным йол ӱмбаке шогалтымаште кугу надыржым палемденыт. Талантан педагог улмыжым да тӱҥалме пашажым умбакыже шуйымо, актер-влак курсым туныктен лукмо нерген палемденыт И.Палантай лӱмеш культур да искусство колледжын вуйлатышыже да педагогшо-влак. Землякышт дене нимучашдымын кугешна Морко калык. Тидын нерген Йошкар-Оласе землячестве вуйлатыше Андреев В.И., Морко район администраций вуйлатышын алмаштышыже Васильев А.Г. эше ик гана пеҥгыдемден ойлышт. Лӱмлӧ художник Ямбердов И.М., журналист Ефимова Н.А., изаже Пектеев В.А., мутат уке, эн шерге йолташым, шольым йомдарыме нерген чон шортын ойленыт.
Пеледыш вазым колтеныт Венгр Республикын Казаньысе генеральный консульство гыч. Тудын пашаеҥже-влакын чаманыме шомакыштым ученый-филолог Кузнецова М.Н. лудын пуэн.
Чаманыме шомакым возыман шуко телеграмме тетрыш толын. «Василий Пектеевын лӱмжӧ Марий республикын веле огыл, пӱтынь элын историйышкыже возалтын», — палемдыме «Шӧртньӧ маске» премий ден фестивальын дирекцийжын возымаште. «Василий Александрович коллеге веле огыл, мемнан театрын кугу йолташыже лийын. Тудо шке талантше дене мемнан репертуарым «Летняя ночь», «Где твое богатство, папа?», «Придорожная ива» спектакль-влак дене пойдарен», — возымо Коми музыкально-драматический национальный театрын телеграммыштыже. «Уста еҥ-влакым йомдараш моткоч неле. Нуно театрым, республикым да финн-угор тӱням тичмаш налмаште вияҥдымаште эше моткоч шуко ыштен кертыт ыле», — тыге палемденыт Удмурт Республикысе национальный театрын вуйлатышыже-влак. Шке чаманымашыштым Мордва, Коми-пермяк национальный театр-влакын коллективышт колтеныт. Башкартостан Республикысе «Эрвел марий» МНКА, Культур пашаеҥ-влак профсоюз реском, Республикысе Курчак театр тыгак телеграмме гоч шке чаманымашаштым палдареныт.
Панихиде эртыме жапыште экраныште В.А.Пектеевын илыш-корныжым фото, почеламут-влак гоч радамлыме. Шкенжын мурымыжым колышташ йӧн лийын. «Гамлет» спектакль гыч Гамлетын монологшым лудмыжо лачак тиде татлан моткоч сайын келшен толын. Артист-влак, йӧратыме «Тӱжем денат» мурыжым тудлан пытартыш гана мурен, шинчавӱд йӧре йӧратыме режиссерышт дене чеверласышт.
Телеграмме-влак эше пурен шогат. Тидыже В.А. Пектеевым пагалыме нерген раш ойла. Тидымак пеҥгыдемда чеверласаш толшо-влакын кужу черетышт, курык наре чумыргышо пеледыш. Венок да пеледыш ик газель кӧргӧ тич чумыргыш. Калык шке йӧратыме эргыжым кужу жап совым кырен ужатыш.
