М. Шкетан лӱмеш ден Марий самырык театр-влакын директорышт Э. Юзыкайн ден А. Бирюков марий йылме дене лекше СМИ, телевидений да радио журналист-влак дене вашлийыныт. Мутланымаш «Пушкин карт» дене пайдаланыме нерген лийын. Кугыжанышын тиде сай проектшым самырык тукымым марий театр искусство дене кумданрак палымым ышташ кучылташ кӱлмо нерген кутырымо. Тидлан кок корно уло: тиде але вес спектакльым ойырен налын, театрыш толаш лиеш; тыгак, мутлан, районысо школ-влак театрым шке декышт ӱжын кертыт.
Ача-ава, школышто туныктышо-влак икшывыштым шочмо йылмылан, марий культур ден искусствылан шӱмаҥдыме суапле сомылыш кумылын ушнат да кӱшнӧ палемдыме карт дене тичмашын пайдаланаш тӱҥалыт манын ӱшаныме шуэш.