6 июньышто М.Шкетан лӱмеш театрыште пайрем шӱлыш озаланыш. Сценын озаже ты гана Марий Элын калык, Россий Федерацийын сулло артистше, драматический да киноактер, режиссер Василий Домрачев лийын. Тудо ты кастене 60 ияш лӱмгечыжым палемдыш.
Усталык касшым юбиляр «Салика» спектакль гыч ужаш дене почо. Тушто шкеже Полат Акпайын рольжым устан модеш. А такше шке жапыштыже тиде пьесым шкежат режиссер семын сценыште шынден, тыгак кинофильмым сниматлен. Тичмаш налмаште, программым В.Домрачевын шындыме спектакльла гыч ужаш-влак дене чоҥымо. Нунын коклаште «Кайыккомбо кашта», «Йӧратымаш? Йӧратымаш! Йӧратымаш…», «Пысман корем», «Ава капитал», «Уло яллан ик Йогор» да моло лийыныт. Ончышо-влак ятыр ий ончыч сценыште модмо постановко-влакым куанен шарналтеныт, тидын нерген шокшо кидсовышышт дене шижтареныт.
Мутат уке, юбилей кас саламлымашлан поян лийын. Марий Элын тӱвыра, печать да калык-влакын пашашт шотышто министрын алмаштышыже М.Матвеев, культур пашаеҥ-влак профсоюз реском председатель В.Ушнурцев, Марий Элысе СТД лӱм дене К. Шамшуров, республикысе театр, СМИ вуйлатыше, У Торъял район вуйлатыше, ГИТИС-ыште пырля тунемше-влак лийыныт. Тыгак телеграмме дене Кугыжаныш Думын депутатше С.Казанков, республикын икымше президентше В.Зотин, Удмуртийын калык писательже АР-Серги, молат саламленыт. Сцене гыч ойлышо-влакат, возен саламлыше-влакат Василий Домрачевын марий калыкын ик эн талантан, Россий кӱкшытыштӧ палыме да республикым чапландарыше еҥ улмыж нерген палемденыт.
Икманаш, В.Домрачевын усталык пашаштыже эше ик йыжыҥым иктешлыме. Ончыкыжо у паша, у шонымаш-влак вучат. Тидым ышташ юбилярын кӧргӧ вийже уло.
