Поро поро дене пӧртылеш

Шкетан театрыште 16 апрельыште «Шочмо кечын» спектакльын премьерже эртыш. Василий Ткачевын пьесыж почеш тудым режиссер, РФ-н сулло артистше Василий Домрачев шынден. Художник-постановщик Надежда Рукавишникова.

Пьесын авторжо тӱҥ героиньын илышыж гоч ялыште илыше шӱдӧ дене  шкет ӱдырамашын пӱрымашыжым иктешлен ончыкта. Но тудын Майра куважын ик ойыртемже уло – порылык. Шке жапыштыже ятыр квартирантлан тудын суртшо шке шочмо мӧҥгӧ гаяк лийын, озавате кажныжлан  чон шокшыжым, кумылжым чаманыде пӧлеклен. Илен-толын, тиде порылык тыгаяк порылык дене пӧртылеш. Эҥгекыш логалмекыже, тудым ончычсо квартирантше-влак пеленышт илаш наҥгаяш толыныт. Но, манмыла, пӱрымаш Майра кувалан адакат мелын савырна: ӱмырым эртарыме суртешак илаш кодаш йӧным ышта.

Спектакльыште Марий Элын калык артистше-влак Светлана Гладышева ден Светлана Строганова, Марий Элын сулло артистше-влак Артем Асмаев, Андрей Бусыгин, Елена Мочалова, артист-влак Алексей Тетерин ден Игорь Антропов (Кеша попугайым йӱкаҥда) модыт.

Марлашке савырыме пьесе дене Светлана Белкова пашам ыштен.

Спектакльым «Лӱҥгалтыш» ансамбльын мурыжо сӧрастара.

 

P.S 13-шо майыште спектакль эше ик гана сценыште

 

Поделиться ссылкой:

© Шкетан театр - 2020

Top