Марий Элын сулло артистше-влак Алина Егошина ден Елена Мочалова шке кумылын ямдылыме «Мый улам шийгорнышто» программыштым икымше гана сценыш кодшо ий шыжым луктыныт ыле. Марий Элын калык серызыже Зоя Дудинан почеламутшо-влак негызеш ямдылыме шкешотан поэтический спектакльым калык тунам пеш кӱкшын аклыш. Тылеч вара артист-влак тудым районласе икмыняр школышто, Башкортостаныште, тыгак 16 мартыште Зоя Дудинан усталык касыштыже ончыктеныт.
3 апрельыште «Мый улам шийгорнышто» программе Актер пӧртышкӧ калыкым погыш. Молгунамсе семынак тудым моткоч сайын вашлийыч. Вет йӱкын да мастарын лудмо годым почеламут корно-влак «чонаҥыт», авторын тушко пыштыме шонымашыже-влакым утларак сайын умылет. Поэт ден колыштшо пйуто шинчаваш ончен мутланат. Тыгак лие тиде кастенат.
Программым мурызо-влак Светлана Яндукова ден Эльвира Трифонова сӧрастареныт.
Е. Никофоровын фотожо.