5 ноябрьыште Марий Элын сулло артистше Алина Егошина «Пеленда улам пиалан» лӱман усталык касышкыже калыкым зал тич погыш. Тушто актрисе театр сценыште 24 ий ыштыме пашажлан шкешотан иктешлымашым ыштыш.
А тудо, каласыман, пеш тӱвыргӧ лектышан лийын. Тиде жапыште марий, совет, руш да вес элласе драматургий материал почеш шындыме спектакльыште 62 образым чоҥен, чылаже 2885 гана сценыш лектын, гастроль корно дене 63 тӱжем километр корным эртен.
Усталык касын икымше ужашыштыже Алина Егошина актер йолташыже-влак дене пырля икмыняр спектакль гыч ужашым модын ончыктышт. Шкенжым Салика («Салика»), Катя («Кеҥеж йӱд»), Тоня («Оръеҥ мелна»), Юмынудыр («Юмынӱдыр»), Ший Пампалче («Ший Пампалче») рольлаште ужна.
Алина Егошина тыгак мурызо семын калыкын кумылжым савыра. Кокымшо ужашыште тудо шуко сылне мурым пӧлеклыш. Кажныжым моткоч шокшын вашлийыныт.
Саламлаш толшо шуко еҥ кокла гыч эн шукынжо шочмо Шернур кундемже гыч лийыныт. Тиде Шернур район администарций вуйлатыше А.В.Кугергин, районысо школ директор, туныктышыжо-влак, Йошкар-Олаште Шернур землячестве лӱм дене С.Ф.Пехметова, М.Щепкин лӱмеш театр училищыште пырля тунемше йолташыже да шуко молат лийыныт.
Тиде усталык касше дене Алина Егошина кугу кӧрго виян, лывырге кумылан, пашам йӧратыше улмыжым эше ик гана пеҥгыдемдыш. Актрисе таче вийвал пагытыште, тудым ончылно эше шуко у роль вуча манын пенгыдын каласаш лиеш.
