Тиде кечылаште Марий книга издательстве М.Шкетан лӱмеш Марий национальный драме театрлан пӧлеклалтше «От «Сардая» до «Йывана Кырла» лӱман книгам савыктен луктын. Авторжо – М.Н.Кузнецова.
Тудо шкеже – ученый, филологий науко кандидат. Но пытартыш жапыште М.Шкетан лӱмеш театр дене кылым пеҥгыдын куча, театрын 100 ияш лӱмгечыжлан пӧлеклалтше энциклопедий шотан изданийым ямдылымаште кугу полышым пуэн. Лач тиде паша негызешак шке книгажымат ямдылен.
Ты изданийыште Марий театрын шочмо да вияҥме корныжым ончыкта, тушто шындалтше 56 спектакль нерген радамлын воза. Тӱҥ шотышто кодшо курымысо 70-ше идалык гыч 2018 ийла жапым авалта.
«От «Сардая» до «Йывана Кырла» книга кумда лудшылан палемдалтын.