Ойган увер

сергеев-анатолий

М.Шкетан лӱмеш Марий драме театрын коллективше  уэш ойгеш возо. Таче, 25 мартыште, артист, баянист Анатолий Сергеевын ӱмыржӧ лугыч лийын.  Пытартыш жапыште тудо черле ыле.

Анатолий Аркадьевич 1959 ий 28 июльышто Морко район Руш-Родо ялыште шочын. Школым тунемын пытарымек,  Морко ДК-ште ыштен. Вара И.Палантай лӱмеш Марий музыкальный училищысе баян классыш тунемаш пурен. 1982 ийыште «самодеятельный оркестрым вуйлатыше» специальность дене дипломым налмек, кок ий Морко ДК-се калык куштышо ансамбльын концертмейстержылан ыштен.

1984 ийыште Анатолий Сергеевым М.Шкетан лӱмеш Марий кугыжаныш театрыш пашаш налыныт.  Да тыште пытартыш кече марте музыкант да артистлан ыштен. Мастарын шоктымыж дене шуко спектакльым да концертым сӧрастараш полшен. Тыгак артист-влакым мураш туныктен.

Семже гаяк тыматле койышан ыле, весым колыштын моштен, полшаш кумылым ончыктен. Сандене коллективыште Анатолийым чылан пагаленыт.

Таче родо-тукымжо, лишыл палымыже, йолташыже-влаклан шке чаманымашнам ойлена.

Анатолий Сергеев дене чеверласыме церемоний 27 мартыште 9.30 шагатлан театр ончылно лиеш.

Поделиться ссылкой:

© Шкетан театр - 2022

Top