19 да 20 ноябрьыште М.Шкетан лӱмеш театрын воштончышан фойеже да залже йоча йӱк дене темын ыле. Тиде кечылаште сценыште йомак негызеш возымо пьесе почеш «Кум ака-шӱжар»/ «Три сестрички» йоча спектакльым марла да рушла модмо. Автор да режиссер – В.Пектеев.
Эн ончыч тудым И.С.Палантай лӱмеш культур да искусство колледжын национальный искусство гимназийыштыже тунемше ӱдыр-рвезе-влак онченыт. Чаманен каласаш логалеш, залыште шинчыше коклаште шукынжо марий ешыште кушкыт гынат, марла ойлымым кусарыме аппарат полшымо дене колыштыныт.
Йоча молан ача-ава йылмым ок пале? Тудым тунемаш кумылан лийже манын, мом ыштыман? Теве тыгай йодыш-влакым тиде спектакль деч вара йыргешке ӱстел йыр мутланымаште каҥашыме. Ушештарена, тидлан тӱҥалтышым 9 ноябрьыште мер организаций вуйлатыше, СМИ пашаеҥ, Йошкар-Ола школласе туныктышо-влак дене вашлиймаште ыштыме ыле. Ты гана нунын деке Марий Эл Кугыжаныш Погын председательын алмаштышыже Е.П.Кузьмин, депутат-влак Л.Н.Яковлева, Н.В.Пушкина, Л.А.Атласкина ушненыт. Мутланымаште республикысе кугыжаныш йылме статусан марий йылмым йочасадыште, школышто туныктымо шотышто сӱретым вашталтыме шотышто корным, тиде вашлиймаш деч вара могай ошкылым ыштышашым рашемдыме. Тидын шотышто кугу ӱшан Марий Мер Каҥаш ден депутат-влаклан ышталтеш.
Ты кастене йомакым рушла, 20 ноябрьыште марла модмо. Кок ганажат спектакль деч ончыч йоча-влак фойеште тӱрлӧ модыш дене модыныт. Тыгак билет почеш пӧлекым модын налын кертыныт. Эн шерге призше Марий сийгудыш еш дене каяш 1500 теҥгеаш сертификат лийын (спонсор В.Воронцов).
