М.Шкетан лӱмеш Марий театрыште 26 апрель теният молгунамсе семынак теният марий тӱняште лӱмлӧ еҥ-влакым шарнымаш кече семын палемдалтын.
Эрденак пӱтынь коллектив дене, М.Шкетанлан памятник воктеке погынен, театр искусствылан негызым пыштыше-влакым шарналтен, вуйым савыме. Вара артист, режиссер, драматург-влаклан Йошкар-Ола уремласе пӧрт пырдыжыш вераҥдыме Шарнымаш оҥа деке пеледышым пыштыме. Тыгайже рӱдолаштына 20 утла уло.
А кастене театр сценыште сылнымут-сылнысем пайрем лийын. Тудым лӱмлӧ марий поэт, кусарыше, критик, публицист Валентин Колумбын шочмыжлан 90 ий теммылан пӧлеклыме.
Валентин Христофорович улыжат 39 ийым илен. Но тиде жапыште тудо моткоч кугу лектышыш шуын, рушла да марла 15 книгам савыктен шуктен. Шуко самырык возышым поро ой-каҥашыж дене ончыкылык творчествылан кумылаҥден. Марий сылнымутыш тудын пыштыме надырже нимучашдыме кугу.
Шкетан театрын артистше-влак В.Колумбын почеламутшо-влакым сылнын лудыныт. Тудын мутшылан Дмитрий Кульшетовын, Ион Кузьминын, Вениамин Захаровын возымо мурыштым Иван Смирнов, Светлана Строганова, Марина Воронцова, Иван Соловьев, Наталья Алексеева, Алексей Юнусов йоҥгалтареныт.
Май тылзе мучаште театр сценыш «Колумб» спектакльым луктеш.