М.Шкетан лӱмеш Марий драме театр ончышылан эше ик у спектакльым аклаш лукто. Тиде В.Пектеевын «Колумб» пьесыж негызеш шындыме тыгаяк лӱман драме. Режиссер-постановщик – автор шкежак.
Лӱмлӧ, виян марий поэт Валентин Колумблан пӧлеклалтше паша ямдылалтме нерген идалык-кокыт ончычак мутым тарватыме ыле. Теве тудо илышыш пурталте. Тидыже В.Колумбын шочмыжлан тений майыште 90 ий темме дене кылдалтын. Ушештарена, поэтын ӱмыржӧ 1974 ий декабрьыште кӱрылтын. Тудлан улыжат 39 ий лийын.
Спектакльыште действий колымшо курымын кокымшо пелыштыже, 1959-1974 ийлаште, кая. Тидын нерген сценыште келыштарыме плакат, персонаж-влакын чиемышт, мурышт, койышышт палдара. Умбакыже тӱрлӧ сцене, эпизод-влак гоч Валентин Колумбын 15 ий жапысе илышыже, усталык корныжо почылтеш. Ончышо шкенжын творчествыштыже да марий сылнымут верч, тудым вияҥден колтышаш верч чон йӱлен кучедалмыжым эскера. Тидым ышташ лишыл еҥже, поэт-писатель, партийный функционер-влак «полшат».
Каласыман, Колумбын рольышкыжо Иван Соловьев моткоч келгын пурен, тудын чыла шотыштат ойыртемалтше улмыжым ончыктыш. Тудын геройжо тӱжвал тӱс дене веле огыл чапле, тудын чонжо поро, шинчымашыже кумда, еҥ-влак дене ӱшандарен кутырен мошта, шке шонымашыжым кеч-кунамат тура ойла. Тудо эше муро кумылан да амал деч посна титаклымым чытен огеш керт. Сорта тул семын кугун да волгыдын йӱлен, кенета йӧрен кайымыжлан ӧршаш уке. Айдеме чон кӱ огыл…
Спектакльысе персонаж-влакын чылаштын прототипышт уло. Действий вияҥ толмо жапыште нуным пален шукташ лиеш. Сандене тиде у пашам ончышо-влак коклаште тӱрлын аклымым умылаш лиеш. Тидын шотышто келгыш пурыде, весым палемдыман, артист-влак кокла гыч кажныже шке персонажшым сайын почын пуэн манаш келшен толеш. Тидын годымак сценыште В.Колумбын шуко почеламутшо йоҥга, нуным автор действийым келгемдаш моштен кучылтеш. А актер-влакын лудмышт годым сылнымут корныла утларак сайын радамлалтыт, тусо сӱрет-влак шинчаончыко толыт. Кӧ манеш, Колумбын возымыжым умылаш неле?..
Спектакльым калык пеш шокшын вашлийын. Тудым ынде август мучаште сценыште ончаш лиеш.
