Таче РСФСР-ын да МАССР-ын сулло артисткыже, МАССР Кугыжаныш, Олык Ипай лӱмеш Марий комсомол, театр премий-влакын лауреатше, Йошкар-Олан почетан гражданинже Галина Иванова-Ямаеван лӱмгечыже. Марий калыкын йӧратыме артисткыжлан 80 ий темын.
Галина Николаевна ӱмыржӧ мучко М.Шкетан лӱмеш Марий театрлан служитлен. Тудын сценыштыже ончышылан ушеш да чонеш кодшо пеш шуко рольым модын. Кажнышкыже актрисе келгын пурен, Тидын нерген театрын сайтыштыже вераҥдыме лаштыкыште радамлын возымо.
Тыгак ончыкылык тукымым ямдылымаште надырже кугу, республикысе культур да искусство колледжыште ятыр ий туныктен. Сценыште пырля модшо самырык артист-влаклан пашам кузе ышташ кӱлмӧ веле огыл, шкем кучымо, шинчымашым пойдарен толмо, мастарлыкым шуарен шогымо шотыштат эре пример лийын.
Г.Иванова-Ямаева шуко жапым мер пашалан ойырен. Сулен налме канышыш лекмыж деч вара неле илыш ситуацийыш логалше-влаклан поро шомак, кӱлеш ой-каҥаш дене полшымо суапле пашам шуктен. Тидым шкенжын шӱм-чон йодмыж почеш ыштен да ышта.
Галина Николаевнам театрын коллективше да ончышо-влак лӱм дене чапле лӱмгечыж дене шокшын-шокшын саламлена. Пеҥгыде тазалыкым, кужу ӱмырым, чон ласкалыкым тыланена.
Ме тендан дене моткоч кугешнена, пагалыме Галина Николаевна!