29 ноябрь – М.Шкетан лӱмеш Марий национальный драме театрын шочмо кечыже. 105 ий ончыч лач тиде кечын Сенькан школышто Кусныл коштшо театр икымше гана Тыныш Осыпын пьесыж почеш «Закон шумлык» спектакльым модын ончыктен. Тудым режиссер семын верысе туныктышо Иван Беляев шынден.
М.Шкетан лӱмеш Марий национальный драме театр таче — тиде:
— Илышын да ончышын йодмашыжым шижын да умылен, тӱвыргӧ лектыш дене пашам ыштыше коллектив. Тудым Марий Эл культурын сулло пашаеҥже Эрик Алексеевич Юзыкайн вуйлата;
— Художественный вуйлатыше, Марий Эл искусствын сулло деятельже Василий Пектеев да кажныже шкешотан, уста режиссер-влак, Марий Элын калык артистше Роман Алексеев, Марий Эл искусствын сулло деятельже Алексей Ямаев, Россий Федерацийын сулло артистше Василий Домрачев;
— «Россий Федерацийын сулло артистше» лӱман Маргарита Медикова, Иван Смирнов, Олег Кузьминых, «Россий Федерацийысе культурын сулло пашаеҥже» Светлана Белкова;
— «Марий Эл Республикын калык артистше» чап лӱман артист-влак Антонина Антонова, Светлана Гладышева, Светлана Строганова, Сергей Данилов, Светлана Сандакова;
— Марий Элын сулло артистше -влак: Артем Асмаев, Андрей Бусыгин, Алина Егошина, Павел Ефимов, Галина Иванова, Людмила Казанцева, Елена Мочалова, Марина Почтенева, Евгений Сергеев, Эдуард Яковлев, Марий Эл культурын сулло пашаеҥже-влак Лидия Сергеева, Эдуард Копцев.
М.Шкетан лӱмеш Марий национальный драме театр таче:
— Тиде тӱрлӧ жанр дене классике да кызытсе драматургий негызеш шындыме спектакльлан поян репертуар; тиде эксперимент шотан камерный постановко-влак;
— Тиде Финн-угор калык-влакын театрыштын кок ийлан ик гана эртарыме «Майатул» фестивальышт. Тудын штаб-квартирже – Йошкар-Ола.
— Тиде Россий кӱкшытан тӱрлӧ фестивальыш ушнымаш. Тыгай улыт «Федераций», «Артмиграций», «Уроки режиссуры», «Реальный театр», «Соло», Национальный театр-влакын тӱрлӧ вере эртарыме фестиваль-влак. Тиде Москвасе, Грозныйысо, Казаньысе, Уфасе, Екатеринбургысо, Саранскысе, Чебоксарысе театр сцене-влак;
— Тиде режиссер, артист-влакын сеҥымашышт. «Гамлет. Машина. Цемент» спектакль дене Российысе национальный театр «Шӧртньӧ маске» премийын номинантше-влак радамыш логалмаш да нунын лӱмышт: Степан Пектеев, Светлана Строганова, Алексей Тетерин, Светлана Скулкина, Иван Соловьев.
— Тиде «Шӧртньӧ маске» премийын лауреатше, театрын тӱҥ, Марий Элын сулло художникше Сергей Таныгин.
— Тиде театрысе шуко тӱрлӧ цех да тушто лым лийде тыршыше еҥ-влак.
Театрын тачысе коллективше тудын историйжым умбакыже воза.Тидын годым ончычсо традицийым арален, илышын йодмашыжым шотыш налын, шке пашажым кугу лектыш дене виктара.
Пайрем дене, театр!