5 февральыште М.Шкетан лӱмеш Марий драме театрын актержо, Марий Эл Республикын сулло артистше Андрей Бусыгинын бенефисше эртыш. Пел курымаш лӱмгечыжлан пӧлеклалтше пайремлан тудо «Китай кува» спектакльым ойырен налын.
Мыскара шӱлышан рольым мастарын модшо тиде актерым ончаш калык шыҥ-шыҥ погынен ыле. Икымше гана сценыш тошкалмыж гычак тудым совым рӱж кырен вашлийыч. Залыште тиде кастене Андрей Витальевичын усталыкшым йӧратыше ончышо, палымыже, родо-тукымжо, шочмо Параньга кундемже гыч толшо-влак шинченыт.
Спектакль пытымеке, нунын кокла гыч шукынжо сценыш кӱзен, артистлан тауштен, шуко поро тыланымашым ойлышт.
