М.Шкетан лӱмеш Марий драме театрын усталык ешышкыже эртыше кечылаште эше ик режиссер ушныш – тиде Алексей Ямаев.
А. Ямаев Марий театрыште икмыняр кутышын ыштен. 2011 ийыште тудым Республикысе Курчак театрын художественный вуйлатышыжлан шогалтеныт. Тиде жапыште шуко оҥай пашам сценыш луктын. Эн кугу сеҥымашлан «Йӱд орол» спектакльым шотлыман, тудо россий театр искусствышто эн кугун аклалтше «Шӧртньӧ маске» фестивальын лауреатше лийын.
— Мый Шкетан театр гыч пӧртылаш шоненак каенам ыле, — икымше кечын у паша верыш толмекыжат мане Алексей Анатольевич. – Тиде жап лу ий шуйныш.
А.Ямаев мемнан театрыште ятыр оҥай спектакльым шынден. «Кугэргыже» (А.Вампилов, 2011), «Йошкар-Ола театральный» фестивальыште Гран-прим сеҥен налын ыле. Ойыртемалтше паша семын Д.Богославскийын пьесыж почеш шындыме «Айдеме йӧратымаш» спектакльжым шотлыман.
Режиссурышто эре уым кычалше, айдеме чонышто пургедаш йӧратыше тиде режиссер Шкетан театрын репертуаржым оҥай постановко-влак дене пойдараш тӱҥалеш манын шонаш чыла амал уло.