Тидын нерген СМИ-н еҥже-влаклан Шкетан театрыште эртыше пресс-конференцийыште увертарыме.
Икымшыже – «Сандалык йӧратымаш». Тудым чылт у манаш огеш лий, вич ий ончыч «Маринавт-влак але Теве кушто илышет» лӱм дене сценыш лектын ыле. Фантастике шотан, ӧрыктарыше декорациян да костюман спектакль. Вара ик жаплан репертуар гыч йомо. Режиссер Роман Алексеев тудын деке уэш пӧртылын, уэмден адак калыклан ончаш темла.
Тудын тӱҥ темыже – йӧратымаш. Мландывалне илыше-влакын чоным ырыктыше тиде ныжыл шижмашышт вес планетыште вашлийме айдеме гай койшо роботын деч ойыртемалтеш мо, да мо дене ойыртемалтеш – теве могай йодышлан вашмутым кычалаш тарата спектакль. Тудо сылне мурылан поян.
Вес спектакль – «Кубик Метри». Тудо драматург-влакын конкурсыштышт сеҥыше тыгаяк лӱман пьесе негызеш шочын. Каласаш кӱлеш, тыште ойлалтше кок пьесынат авторжо – Зинаида Долгова. Режиссер Василий Домрачев тудын тӱҥ шонымашыжым тыге умылтара. Айдеме ӱмыржӧ мучко сай илышым кычалеш. Тидлан тӱня тӱрышкат каяш ямде да кая. Но … чынжым гын, чон куатше тудын шочмо мландыште. Тушто, кушто тудо чарайолын куршталын, тушто, кушто икымше гана йӧратымаш тул дене когарген, тушто, кушто пошкудо-влак дене ик ешла илен… У спектакльын геройжо Метри тидым сулен налаш шумо ийготым вачываке пыштымеке веле умылен. Да ала-кунам шукертак ача-коча пӧрт омсаш сакен кодымо кӧгӧным почын пурен да кодшо ӱмыржым тышан шукташ кумылаҥын.
Режиссер-влак журналист-шамычын йодышыштлан вашештеныт.
