“Оръеҥ мелна” спектакльыште тудо ынде латкудымшо ий — Глафира. Тӱҥ роль огыл гынат, актрисылан тудо моткоч келша. Героине ойыртемалтше: оҥай, лӱдын-вожыл ок шого, чолга.
Шкетан лӱмеш Марий театрыште 10 апрельыште 15 шагатлан актрисе Светлана Филиппован бенефисше лиеш, пайрем касыште тудо ончаш толшо-влакым Арсий Волковын “Оръеҥ мелнаж” дене сийла.
Светлана Валериевна Волжский районысо Куэрласола ялыште шочын. Вара ешыже У Поратыш куснен. Тысе школым тунем пытарен. Ӱдыр изинек акаже да коваж дене пырля концерт дене коштын, такмакым мураш йӧратен. Коваже балалайке дене шоктен, а нуно мурен-куштеныт, мыскара сценкым ончыктеныт. Такмак-влакым Света газетла гыч пӱчкеден луктын, иктыш поген. Школышто тунеммыж годым театр кружокыш коштын. Кугурак класслаште ик конкурсышто сеҥеныт, тыге Светланалан Палантай лӱмеш тӱвыра да сымыктыш колледжыш театр пӧлкаш пураш направленийым пуэныт. Лач тунам, 1995 ийыште, режиссер Василий Пектеев у группым почын да курыкмарий ден олыкмарий йылмым палыше-влакым ик группыш поген.
Кӱшыл шинчымашым Светлана Филиппова Санкт-Петербургысо театр академийыште налын.
Колледжыште тунеммыж годымак театрыште модын, “Полдалге” (Э.Рисклакки) постановкышто Ирина лийын. Света шкеж нерген характерный актрисе улам манеш, утларакшым тугай рольым модын. А такшым тудо шыма, поро койышан, мутланыме годымат проста, ныжыл йӱкшӧ дене кумылым савыра.
Тӱсшӧ да кужу капан улмыж дене Голливудысо актрисыла чучеш. Теве Г.Каюмын “Туларте мыйым, шеремет” пьесыж почеш шындыме спектакльыште баскетболисткым модын. “Театрыште пашам ыштыме жапыште кок гана “Ой, луй модеш” спектакльыште Тамаран образшым чоҥенам гынат, тиде роль мылам тачат эн лишыл да шерге. Тамара – Кырлан ватыже, руш ӱдыржӧ, спектакльыште рушла мутланенам. Шарналтем ты спектакльым да могыремланат шокшын чучеш”, — ойла актрисе.
Светлана Филиппова Сергей пелашыж ден кок икшывым – эрге ден ӱдырым — куштат. Никита икымше классыште тунемеш, а вич ияш Катюша йочасадыш коштеш. Никиталан театр келша, тудо “Морко сем” спектакльыште сценыш модаш лектын.
Светлана Валериевна пӱртӱсыштӧ уло чонжо денак кана, шкежат мӧҥгыштыжӧ пеледышым пеш шуко кушта, тиде шкешотан хоббиже. Ужар тӱсым моткоч йӧрата, шинчажат тыгаяк тӱсан.
“Бенефисым кажне вич ий коден эртарат, а мыйын тиде — икымше бенефисем, тудым ончыкташ кӱын шуынам, садлан уло кумылын пайремышкем вучем”, — манеш тудо.
Изинек сценыште усталыкшым ончыктен кушкын да, очыни, садлан южо ӱдыр-рвезе семын артист лияш шонымашыже пеш лийын огыл. А корно ты чевер саска гай мотор ӱдырым шке ончыкылыкшым муаш виктарен. Театрыш тудым илыш-пӱрымаш конден. Коваж деч балалайкым шокташ тунем кодеш гын, кызыт Светланан кидыштыже сем ӱзгарымат ужына ыле. Ме тудын модмыжым ончен, кече гай ончалтышыж гыч кумылнам волгалтарена.
Татьяна Иванова «Кугарня» газет, 2016 ий 11 март