Алексей Иванович Маюк-Егоровын лӱмжӧ М.Шкетан лӱмеш Марий драме театрын веле огыл, Марий Элын тичмаш эртыме корныштыжо икымше профессионал марий режиссер семын курым-курымлан шӧртньӧ буква дене возалт кодын. Курык марий районысо Изи Шындыръял школын шочшыжо марий театр искусствын тӱҥалтыш да ик эн неле ошкылым ыштымашкыже кугу надырым пыштен.
1927 ийыште Марий музыкально-драматический искусство студийыш тунемаш пурен. Тиде студий негызеш 1929 ийыште Марий кугыжаныш театрым почмо. Икымше профессионал актер радамыште Алексей Маюк-Егороват лийын. А 1930 ийыште Алексей Иванович Рӱдо Театральный искусство техникумын драматический отделенийышкыже тунемаш пура. Но идалык гыч ГИТИС-ысе режиссер отделенийыш кусна. 1936 ийыште Маргостеатрыш пӧртылеш, ончыч режиссерлан, вара тӱҥ режиссерлан пашам ышташ тӱҥалеш.
Но театрыште икмыняр спектакльым веле шынден шукта. Тиде «Доходан вер», «Чодыра» (А.Островский), «Дубровский» (А.Пушкин), «Шкет парус» (В.Катаев). Тӱҥ пашаже — «Салика» комедий. Сергей Николаевын «Полатовын сӱанже» пьесыжым автор дене пырля тӧрлен-ешарен «Салика» марте шуктеныт. Тиде спектакль чыла жапыште театрын тӱҥ-рӱдӧ пашаже семын аклалтеш.
Алексей Маюк-Егоров шуко моло тале марий, тыгак театр пашаеҥ-влак дене пырля репрессий оравашке логалеш да 1938 ийыште ӱмыржӧ кӱрылтеш.
2025 ий 19 январьыште шочмыжлан 120 ий теммым шочмо Курык марий кундемыштыже кумдан палемденыт. Тушко М.Шкетан театрат ушнен. Эн ончычак шочмо Изи Шындыр-Шындыръял тӱҥ школышто мероприятий-влак лийыныт. А кастене Виловатыште театрын артистше-влак сценыш концерт программе дене лектыныт. Тудым театрын 105 ияш да икымше профессионал режиссерын 120 ияш лӱмгечыжлан пӧлекленыт.
Нине мероприятийым эртарымаште театрын актрисыже, Марий Элын сулло артистше, Курык марий кундемын чолга ӱдыржӧ Марина Почтенева надырже кугу.