14-19 сентябрьыште Башкортостаныште Шкетан лӱмеш Марий национальный драме театрын Кугу гастрольжо эрта.
Икымше кечын Башкортостан республикын академический руш драматический театрын сценыштыже гастрольым официально почмо. Сцене гыч саламлыме мутым «Эрвел марий» НКА-н исполнительный директоржо Р.С.Плотников ден Марий театрын директоржо Э.А.Юзыкайн ойленыт.
А вара калыклан «Ший Пампалче» мюзиклым ончаш темлыме. Марий мифологий негызеш шындыме тиде спектакль чыла могырымат пеш сӧрал. Тудо мурылан поян. Калык тудым шокшын вашлийын.
15 сентябрьыште марий калык йомак негызеш ямдылыме «Три сестры» да «Йыван Кырла. Путёвка в жизнь» спектакльым модын ончыктат.
Гастроль корно умбакыже районлашке кусна. Мишкан, Калтаса районласе тӱвыра пӧртыштӧ, Нефтекамск ден Бирск олалаште кечывалым йоча-влак «Каша из топора» йомакым ончаш йӧн лиеш, кастене «Ава каПИтАЛ» комедийыш кугурак тукымым ӱжыт.
Кугу гастроль дене тылеч ончыч Башкортостаныш кум ий ончыч мийыме. Тунам «Нур» театрын сценыштыже «Салика», «Оръеҥ мелна», «Илена-йӱлена» спектакль-влакым да «Нӧнчык патыр» йомакым модын ончыктымо. «Илена-йӱлена» да «Уло яллан ик Йогор» спектакль-влакым вараже Башкортостан ден Татарстан республикыласе райцентрлаште ончыктымо.