3 июньышто «Театральный Йошкар-Ола -2024» фестивальым иктешлыме пайрем эртен. Тудым фестивальыште шке мастарлыкым тергыше-влак шӱм вургыж вученыт.
М.Шкетан лӱмеш Марий драме театр тенийсе фестивальыш кок спектакльым луктын ыле — «Спасти камер-юнкера Пушкина», «Кеҥеж йӱд» музыкальный комедий. Артист-влаклан кокытшат сеҥымашым конден. Фестивальын жюриже моно-спектакльыште Марий Элын сулло артистше Павел Ефимовын модмыжлан кӱкшӧ акым пуэн, тудо Йыван Кырла лӱмеш театр премийын «драматический спектакльыште эн сай пӧръеҥ роль» номинацийыште лауреат лийын. «Драматический спектакльыште эн сай ӱдырамаш роль» номинацийын озаже – Марина Воронцова. Тыге аклыме «Кеҥеж йӱд» спектакльыште модмо Ольган рольжылан. Марий Элын сулло артистше Андрей Бусыгинлан эпизод рольышто модмылан лауреат лӱмым «Кеҥеж йӱдысӧ» Маркан образше конден. Жюрин лӱмын ыштыме «актер дуэт» призше дене Кристина Лебедева ден Генрих Тимиряев палемдылтаныт. «Кеҥеж йӱдыштӧ» Катя ден Мичушым нуно пеш сайын келыштарат.
Саламлена лауреат-влакым. Ончыкыжо эшеат кугу кӱкшытым тыланена.
