14 мартыште М.Шкетан лӱмеш Марий драме театр «Кубик Метри» лӱман эше ик у спектакльым сценыш лукто. Режиссер Василий Домрачев тудым Зинаида Долгован тыгаяк лӱман пьесыж почеш шынден. Ушештарена, тиде произведений кок ий ончыч марий драматургий конкурсышто икымше вер дене палемдалтын.
А, чынжымак, молан Кубик Метрий? Залыште шинчыше еҥ действий кайыме жапыште тогдая. «Тый Йошкарвуй Метрин Метрижын Метриже улат», — манеш Аню Метрилан. Тыге лектын рвезылан лӱмедыш.
Жанр шот дене тиде паша — драме. Автор марий ялын кочо пӱрымашыж шотышто чон дене шортеш. Шотшо почеш, Метри гай самырык еҥ-влак кугезе коча-коча-ачан тӱҥалме пашаштым шуен, шочмо верым ончыкыжо тӱзатышаш улыт ыле. Но икте, весе, кумшо … шочмо сурт омсаш кӧгӧным сакен коден, тӱня мучко манме гай шаланен пытеныт. Сулен налме ийготыш шумеке, уэш ача-коча мландыш пӧртылын, тудлан у шӱлышым пуаш лиеш мо? Ала дыр. А мланде?.. Лийже тудо курал-ӱдымӧ але чодыра дене леведалтше — тудын эре акше уло. Когуш – Григорий Семеныч – пошкудо-влакын сурт олмыштым налаш шонышо шкетын улам шоныш, векат. Но йоҥылыш лийын — тиде кундемлан шинчам пыштыше весат лектын.
Спектакль Метрин монологшо гоч пел курым наре ончычсо марий ялым сӱретла, йӧратыше чоныш шӱвалме ӱдырамашын пӱрымашыжым почын пуа. Моткоч оҥай йӧн дене кугезе-влак дене ваш ышта.
Ончышо сценыште мо ышталтмым моткоч тӱткын эскерен, жапын-жапын совым кырыме шергылтын — тыге тудо шке шижмашыжым ончыктен, шонымашыжым палдарен. Икманаш, тиде паша калык деке шуын манаш чыла амал уло.
***
Спектакльым сценыш лукташ ямдылыме жапыште театр «Шочмо ялем» фотоконкурсым увертарен ыле. Премьер кечын эн сай паша-влакым фойеште ончерыш чумырымо. Кажне фотоснимке пелен еҥ-влакын шочмо суртышт, шочмо ялышт да кундемышт нерген чонеш логалше шомакыштым вераҥдыме.
Антракт жапыште сеҥышыш лекше-влаклан пӧлекым кучыктымо. Теве нуно кӧмыт улыт:
1-ше вер – Надежда Петрова , Киров кундем, Лопъял
2-шо вер – Виктория Матвеева, Морко район, Смычка ял
3-шо вер – Юлиана Егошина, У ТТоръял район, Изи Пызак ял.