Top.Mail.Ru

Комедий мастар

Арсий-Волков-100-ий

9 сентябрьыште кумдан чапланыше драматург Арсий  Волковын шочмыжлан 100 ий.

Арсий Афанасьевичын прозо дене возымо произведенийжат шагал огыл. Сылнымутыш корныжо ойлымаш гыч тӱҥалын. Тиде сомыллан пижаш  ик ялыште шочын-кушшо  М.Шкетанын илыш да усталык корныжым шымлымыже  таратен.  Тыге «Шкетанын геройжо-влак» ойлымаш цикл шочын.  Тыгак «Каче-влак»  мыскара повестьым, «Илыш толкын шарнымаш романым, «Кузе комедий шочеш» книгам савыктен.

Но эн кугу суапше, — мутат уке,  драматургий жанрым вияҥдымаште. Тидлан ӧршаш уке, вет  Арсий Волков  музыкально-театральный училищым тунемын пытарен, Маргостеатрыште актерлан пашам ыштен. Икымше пьесыже «Йормошка», йомак-пьесе «Мотор Пампалче», «Шочмо ялыште» лийыныт.  Пытартышыже 1948 ийыште  Маргостеатрыште шындалтын. Марий авторын лӱмжӧ Моско марте «йоҥгалтын». Тиде лирический пьесым, икмыняр тӧрлатен, «Ксения» лӱм дене  элын рӱдоласе М.Ермолова лӱмеш театрын сценышкыже луктыныт.  Тылеч вара Украиныште, Белоруссийыште, Карелийыште, Чувашийыште, Татарийыште  шынденыт. 1954 ийыште  болгагр йылме дене София олаште  посна книга дене савыктен луктыныт. Вес кундемлаште тетла ик марий авторынат возымыжо  тынаре шындалтын огыл.

А.Волков чылаже 20 наре пьесым возен. Тыге М.Шкетан лӱмеш  театрын репертуаржым пойдарымашке нимучашдыме кугу надырым пыштен. Тудын пьесыж почеш шындыме  спектакльлашке калык эре  зал тич погынен. Автор, манмыла, ала-мом уым шонен лукшаш верч орланен огыл. Тудо йырваш улшо илышым  сценыш кусарен, геройжо-влакат палыме да лишыл улыт. Тӱшка пашаште, посна айдемын койышыштыжо уто-ситым мыскара полшымо  дене «пӱшкылын», шыргыжалаш таратен.

«Оръеҥ мелна» пьесыже икмыше гана 1962 ийыште шындалтын.  Тулеч вара сцене гыч кораҥын огыл, манаш лиеш. Режиссер-влак уэш да уэш тудын деке пӧртылыныт. Тачат тудо М.Шкетан лӱмеш Марий театрын репертуарыштыже ила.  Кугурак тукым артист, театрысе моло пашаеҥ шкенжым поро кумылын шарнат.

Поделиться ссылкой:

Top