30 октябрьыште М.Шкетан лӱмеш Марий драме театр у тургымышто кумшо премьерым калыклан темлыш. А.Богачеван пьесыж почеш шындыме «Китай кува» комедий залым шыҥ-шыҥ погыш.
Эше спектакль тӱҥалме деч ончычак воштончышан фойеште калык гӱжлен. Китай куштымаш да трук толын лекше бутафорский Дракон кумылым нӧлталыныт, эрвел костюман ӱдыр-влак дене пырля лӱмын ямдылыме фотозонышто сниматлалташ эсогыл черет лийын. Марий кундемыште ончен куштымо вуйдеҥге (кипрей, Иван чай) чайым тамлен йӱыныт.
Тиде пьесым актер-влак шке ойырен налыныт, вуйлатыше-влак нунын темлымышт дене келшеныт. Роман Алексеев режиссер семын мастарын шынден. Тӱжвач ончымаште весела да оҥай сюжет линиян ты комедийыште чоныш логалше тат ятыр уло, нуно ончышо еҥым шоналташ да шонкалаш таратат.
Спектакльыште персонаж шагал. Но нуным модшо кажне актер – шке верыштыже, кажныже образым ӱшандарышын чоҥа. Теве нунын лӱмышт: РФ-н сулло да РМЭ-н калык артистше Маргарита Медикова, РМЭ-н калык артистше Антонина Антонова, МАССР-ын сулло артистше Юрий Алексеев, артист-влак Галина Иванова ден Генрих Тимиряев.
Спектакльын художникше — Анастасия Чубукова, сем дене Сергей Пчелкин сӧрастарен. Пьесым Светлана Белкова марлаҥден.
