26 июньышто Морко район Унчо ялыште М.Шкетан лӱмеш театр «Кавасе алаша» спектакль дене кеҥеж тургымым петырыш. Уке, тыге манме йоҥылыш лиеш. Тудо умбакыже августышто шуйна. Сорла тылзын 14-ше кечынже Провой кундемысе Какшамарий селаште «Палантай» спектакль-концертым тыгак пӱртӱс аланыште модаш палемдыме.
Ушештарена, тений икымше гана ик тылзе жапыште пӱртӱс аланыште ныл спектакльым модмо. 29 майыште Шернур район Чылдемыр, 12 июньышто Юлсер кундем Карай яллаште Н.Арбанын пьесыж почеш шындыме «Кеҥеж йӱд» музыкальный комедийым калык пеш шокшын вашлийын. 5 июньышто У Торъял поселкышто, 26 июньышто Морко район Унчо ялыште «Кавасе алаша» («Небесный тихоход») «залыш» шуко еҥым поген. Каласыман, палемдыме верлашке ончаш толшо-влак моло вес районла гычат лийыныт. Вет пӱртӱс аланыште спектакль йӧршеш вес семын ончалтеш. Молан манаш гын, декораций тыште пьесыште ончыктымо деке лишыл. Мутлан, «Кеҥеж йӱдыштӧ» тудо клуб ончылно эрта гын, модмо верым лачак ондаксе гаяк клуб але тудлан келшыше тошто оралте кумдыкышто ойырен налме. А кокымшо мурсем комедийыште действий Кугу сар жапыште пӱртӱс лонгаште кая.
Кажне модмо спектакль мо дене гынат шарнаш кодеш. Ик вере йӱрвошт модмо, вес вере сар жапысе технике дене пайдаланыме… Тенийсе кеҥеж шокшыж дене огеш куандаре, кас эреак юалге шога. Сандене артист-влаклан нӧрашат, кылмашат логалын. Но ик ганат икте дечат тидын шотышто ӧпке мут шоктен огыл. Тидыже нунын шке пашам да шке ончышым мучашдымын йӧратымышт нерген раш ойла.
Пӱртӱс аланыште модмо проектым илышыш шыҥдараш – куштылго паша огыл. Пеш шуко ешартыш сомыл лектеш. Тидыже эн ондак калыклан шинчаш верым ямдылыме, электровийым ситарыме дене кылдалтын. Районысо да верысе администраций, культур да школ пашаеҥ-влакын полышыштлан кӧра чыла шонымым илышыш пуртен кертме. Театр нунылан пеш кугу таум ышта.
Тыгеракын, театр огеш чеверласе, августышто вашлиймешке манеш.