Тений М. Шкетан лӱмеш Марий кугыжаныш драме театрын черетан тургымжо петыралтме лӱмеш мероприятий лийын огыл. Тудо эре апрель мучаште эртаралтеш ыле. Артист-влак тений майыштат модыныт. Калык артистке Светлана Строганова эсогыл 21 майыште шке лӱмгечыжлан пӧлеклалтше бенефисшым «Юмынӱдыр» спектакль дене эртарен.
Тыге, театрын тургымжо «кеҥеж жапыш» куснен. Тидыже районлаш лектын, пӱртӱс лоҥгаште модаш тӱҥалмым ончыкта. Икымше тыгай спектакль Шернур районысо Чылдемыр ялыште «Кеҥеж йӱд» («Летняя ночь») лийын. Тудо 29 майыште эртен.
Ондак тыгай мероприятий-влак августышто, кече кӱчыкемаш тӱҥалме да игече юалгымеке, лийыныт. Тений, ончычсо опытым иктешлен, тудым шокшырак жапыш – май-июньыш – кусарыме. Но пӱртӱсын шке планже. Май мучаште йӱран игече шоген. Меат лач тудлан «логална».
Игече начар лийшаш нерген возалтын гынат, сайлан ӱшанен, билетым ончылгоч налаш тӱҥалыныт. Клуб ончылан жаплан келыштарен ыштыме 300 веран зал тич темын манаш лиеш. Еҥ-влак спектакль тӱҥалме деч 45 минут ончыч толаш тӱҥалыныт. Тиде жапыште йӱр чот опталын. Но спектакль тӱҥалме жаплан чарнен. Ончаш толшо-влаклан сиденьыш шараш шартышым пуэныт. А шкешт нуно утларакшым дождевик да зонт дене лийыныт.
Чыла сай ыле, но клуб ончылно модаш палемдыме кумдык-сцене (пьесыште действий кеҥеж кастене-водын ялысе клуб ончылно кая) нӧрымӧ дене яклака лийын. Но артистна-влакым тиде нимынярат ӧрыктарен да лӱдыктен огыл. Мутлан, Алгаев рольым модшо А. Юнусов яклешт каен, но туге модын колтен, пуйто тиде пьесыштак тыге палемдалтын улмаш. Вес сценыште тудо пален: ынде тудлан Ольга – М. Воронцова – ончылан сукалтен шинчаш кӱлеш, сандене мландыш пышташ кидйымак логалше шартыш дене лектын. Тыгай тат-влак ятыр лийыныт. Артист-влак мизансценым шкеак шонен луктыныт. Мутлан, Катюша – А. Егошина – клуб окнам мушкын… А Иван Смирнов кузе модо! Тудо шке рольыштыжо ийын кошто манаш лиеш, темлыме условийыште моткоч сайын модо. Тудлан пиал шыргыжалын: пьесын содержанийже почеш тудо брезент плащ да кем дене чиен.
Но спектакль пелыж наре эртымеке, уэш йӱр шыве-шыве йӱраш тӱҥале, а мучаште чотак оптале. А вет тӱшка куштымашке пӧръеҥ-влак кӱчык шокшан тувыр дене лектыныт. А Тамара – С. Строганова – шпилькан ош туфльо дене «коштын». Да тугакшат артист-влак вычкыж платьым чиеныт.
Но артист-влак мучаш марте модын шуктышт. Ончаш толшо-влакат чытенак шинчышт, мучаште кужу жап совым кырышт. Нунылан пеш кугу таум каласыман. Тыге шоналтет: арам огыл театр тыгай уремыште ончыктымаш-влакым эртара. Тиде калыклан кӱлеш, вет чылан олаш спектакль ончаш миен огыт керт. А тыште театр шкеже калык деке толеш. Пеледыш шуко ыле, театрлан шуко поро мут йоҥгалте.
А артистна-влак? Спектакль пытыш, нуно вургемым вашталтен чиен шогальыч. Кылмымылан, модаш неле лиймылан вуйым шийме ик мутат ыш лек. Нуно тыгай условийыштат шке пашаштым чаплын да чаткан ыштышт.
Пӱртӱс лоҥгаште спектакльым модшашлан пеш сайын ямдылалтман. Верлаште полшыш ок лий гын, театр шке семынже веле тидым ыштен ок сеҥе. Тиде ганат театр Шернур кундем вуйлатыше гыч тӱҥалын… таум ышта. А чынжым гын тиде списке кужу….
А мемнан марафонна умбакыже шуйна. 5 июньышто У Торъял посёлкысо стадионышто «Кавасе алаша» («Небесный тихоход») музык комедийым модаш тӱҥалына. Тушто А. Куклинын Кугу сар жапысе техникыже участвоватла;
12 июньышто Волжский районысо Карай ялыште – «Кеҥеж йӱд» («Летняя ночь»);
26 июнь Морко районысо Унчо ялыште – «Кавасе алаша» («Небесный тихоход»).
Игече сайрак лиеш манын ӱшанена да ончаш толшо-влакым вучена. Билетым театрын сайтше да приложенийже гоч ончылгоч налаш лиеш.
