Август тылзыште М.Шкетан лӱмеш театр кок гана Йошкар-Ола деч ӧрдыжкӧ лектын спектакльым модо. 16 августышто «Нӧнчык патыр» йомакым рушла элын рӱдолаштыже – Москваште – «Театральный бульвар» кышкарыште ончыктыш. Арня гыч, 23 августышто, эше кеҥеж тӱҥалтыште увертарыме семынак, Морко районысо Ӱшӱттӱр ял пӱртӱс аланыште «Кавасе алаша» спектакль дене калыкым куандарыш.
Мутат уке, тургыжланаш логале. Вет тиде кечылаште кундемна мучко йӱран ыле. Кунамже шыжа веле гын, вес ганаже ложгеак оптале. Шуматкечынат тыгак ыле. Ӱшӱттӱрым веле тиде кечын пыл эртен коштын. Кастенат йырым-йыр волгенче волгалтын гын, тыште спектакльым ласкан модаш йӧн лийын.
— Артист сценыш лектеш гын, йырым-йыр мо ышталтмым ончаш ок ярсе, тудо ончаш толшо калыкым веле шижеш. А тиде гана ончышо мемнам пеш шокшын вашлийын, тидым воштыл колтымыж дене, совым кырымыж дене шижтарен, — манеш Марий Элын калык артистше Э.Яковлев.
А теве икмыняр зрительын акше.
Любовь Александрова:
— Браво артист- шамычлан! Пеш чот келшен! Спектакльым театрыште онченам ыле, а ынде пӱртӱс лоҥгаште ончышым! Вес эмоций! Тау!Ирина Булыгина:
— «Кавасе алаша» мотор пӱртӱс лоҥгаште, Ӱшӱттӱрыштӧ, моторын, ик
шӱлыш дене чоҥештен кайыш. Шуко калыклан кужу жаплан поро шарнымашым кодыш. Чынак, Шкетан театырын артистше-влак талантан улыт, чоныш логалын модын моштат. Ме война годсо ӱдыр, рвезе-влакын илыш сӱретыштым киднам совен, воштылын ончышна. Уло кумылын ТАУ, ТАУ, ТАУм каласена мемнан каснам тыгай чапле марий спектакль дене мучашлымыштлан, сӧрастарымыштлан.
Каласена, тиде кечын Ӱшӱттӱр калык эше ял пайремым эртарен. Кызыт ӧрдыж кундемыште илыше да шочмо ялыш унала толшо-влакат Шкетан театрын спектакльжым ончаш ушненыт. Пайремым кавашке шыжалт нӧлталтше тулсавыш чынжымак чот сӧрастарен.
Мутат уке, чыла сӧрымым шуктен кертме огыл. Йӱран игечылан кӧра авиашоум ончыкташ йӧн ыш лий. Да лач тыгай годым театрын калыклан кӱлешан улмыжо рашемеш. Тудо артист-влакым шке шокшо кумылжо дене ырыктыш, вийым ешарыш.
Тыгеракын, калык деке верыш лектын, пӱртӱс аланыште модмо йӱла ынде утларак да утларак келге вожым колта.
— Июнь мучаште концерт годымат тыгаяк сӱрет ыле, йырымваш йӱр йӱрын, а тиде кундемым эртен каен. Юмо Шкетан театрым йӧратенак йӧрата, — тыгай ыле иктешлымашыже театрым вуйлатыше Э.А.Юзыкайнын.
