30, 31 январьыште М.Шкетан лӱмеш Марий драме театрын сценыштыже артист-влак эше ик у спектакльым модыч. Тиде «Небесный тихоход» кинофильм негызеш ямдылыме «Кавасе алаша» музыкальный комедий. Тудым коллектив Кугу Сеҥымашын 80-ше идалыкшылан пӧлеклен.
1945 ийыште экраныш лекше тиде фильм театрлан возышо сценарист-влакын шинчашкышт логалде кертын огыл. Режиссер Роман Алексеев А.Яковлевын пьесыжым ойырен. Молан? Тудо шуко муро-куштымашан улмыж дене ойыртемалтеш. А марий театрын ончышыжо тыгай спектакльым ончаш поснак кугу кумылан. Тидым пеҥгыдемдыш тудо нине премьер кечылаштат. Калык у пашам чот сайын вашлийын.
Сар жапыштат илыш шке радамже дене кая. Лач еҥ-влак тынысле пашам ыштыме олмеш боевой заданийым шуктат. Тиде спектакльыште герой-влак чыланат авиацийыште служитлат. Иктышт писе да кугу куатан истребитель дене чоҥештылыт, весышт — изирак скоростян, фанера манме У-2 самолет дене. Нунын кокла гыч кажныже фронтышто кӱлешан лийын, кажныже шке йӧнжӧ дене сеҥымашым лишемдаш полшен. А самырык да ийготым погышо герой-влакланат илен лекташ сай ончыкылыклан ӱшан полшен. Тиде ӱшанжым кок еҥ кокласе ылыжше йӧратымаш тул ылыжтен.
Режиссер-постановщик Роман Алексеев, художник-постановщик Сергей Таныгин, сем пашам виктарыше Светлана Яндукова, балетмейстер Геннадий Бахтерев, вургем сӱретче Лариса Воробьева ынде ик спектакльым веле огыл пырля шынденыт. Нунын ямдылыме «Кавасе алаша» театрын репертуаржым эше ик чапле паша дене пойдарыш.
Спектакль кок состав дене шындалтын.