26 октябрьыште Оршанке районысо Пуялыште РСФСР-ын калык артистше С.И.Кузьминыхлан Шарныктыш кӱм почмо. Тудым Степан Ивановичын родо-тукымжо ямдылен.
С.И.Кузьминыхын лӱмжӧ Марий театр искусствышто шӧртньӧ буква дене возалтын. Лӱмлӧ режиссер С.И.Иванов «Марий театрын мастарже-влак» книгаште тиде еҥ нерген возымо очеркшым «Марий сценын чолга шӱдыржӧ» манын таклан огыл лӱмден. Ты актер кеч-могай спектакльыште рӱдӧ верым налше рольым модын. Тиде, мутлан, Олег Кошевой («Рвезе гвардий»), Азамат («Айвика»), Ромео («Ромео и Джульетта»), Янлык Пасет, Хлестаков («Ревизор»), Григорий Веткан («Элнет»), Володя Ульянов («Еш»), Егор Булычев… Тиде радамым умбакыжат шуяш лиеш. Тиде веле огыл, С.Кузьминых шкенжым режиссер семынат терген. Кугу пашам ыштен самырык актер-влакым куштымаште. Эрвел кундемыште илыше марий-влак деке лач тудо корным почын.
С.И.Кузьминыхын пашаже тӱрлӧ награде дене палемдалтын. Эн кугужо – «РСФСР-ын калык артистше» чап лӱм. Тыгай лӱмым таче кече мартеат кок марий артистлан веле пуымо. Кокымшыжо Виктор Бурлаков лийын.
Степан Ивановичым шочмо Пуял кундемыштыже порын шарнат. Тидын шотышто эн ончычак шке тукымжо нерген ойлыман. Кажне вич ий гыч шарнымаш касым эртарат. А шочмыжлан 105 темме вашеш Шарныктыш кӱм ямдылаш пижыныт. Тиде сомылым лӱмлӧ артистын тукым шольыжо Александр Иванович Кузьминых виктарен. Окса роскотым родо-тукым тӱҥ шотышто шке ӱмбакыже налын, тыгак ял калык шке надыржым пыштен. Скульптурым Марий Элын сулло художникше В.М.Карпеев ямдылен.
Шонымо – ыштыме. Тыге кодшо шуматкечын С.И.Кузьминыхлан Шарнымаш кӱм торжественно почмо. Тушто М.Шкетан лӱмеш Марий драме театр дечат кугу делегаций лийын. Театрын художественный вуйлатышыже В.А.Пектеев, артист-влак Ю.Алексеев ден О.Кузьминых калык ончылно шке шарнымашыштым ойленыт. Сергей Данилов, Евгений Сергеев да Олег Кузьминых тыгак верысе «Сескем» ансамбльын программышкыже ушненыт, икмыняр мурым пӧлекленыт.
«Памятникым шогалтышна. Ынде чонланат ласка лие», — мане пытартышлан Александр Ивановичын Зинаида шӱжарже. Тыге ойлен кертеш лач тудо еҥ, кӧ шке тукымжым чынжымак пагала, чапланыше родыжын лӱмжым аралышаш сомылым шке порысшылан шотла.