Нине кок лӱм марий сылнымутышто пытартыш жапыште, моткоч чак кылдалтын, йыгыре ошкылыт. Тидым 16 мартыште М.Шкетан лӱмеш Марий драме театрыште эртыше «Луй модмо вер» усталык да порылык кас эше ик гана пеҥгыдемден ончыктыш.
Марий Элын калык серызыже Зоя Дудина тудым шкенжын 60 ияш лӱмгечыжлан да лӱмлӧ пошкудыжо, кино да театр артист, поэт Йыван Кырлам шарнымашлан пӧлеклен. Кас тӱҥалтыштак ме Йыван Кырла (РФ-н сулло арт. Иван Смирнов) дене пырля марий сылнымутын классикше-влак Сергей Чавайн (арт. Акпарс Иванов) да Яков Майоров – Шкетан (РМЭ-н сулло арт. Эдуард Яковлев) денат «вашлийна». Каласаш кӱлеш, тений Чавайнын шочмыжлан 135, Шкетанын шочмыжлан 125 ий темеш. Нине персонаж-влак эн ончыч шкеныштын возымыштым, вара Йыван Кырлан почелемутшым лудыныт. Икымше ужашым умбакыже Марий Элын сулло артистше-влак Алина Егошина ден Елена Мочалован Зоя Дудинан почелемутшо-влак негызеш ямдылыме «Мый улам Шийгорнышто» поэзий спектакль шуен.
Кокымшо ужашым Зоя Дудинан почеламутшылан возымо муро-влаклан пӧлеклыме ыле. Тыште кугурак верым Шкетан театрыште шындыме «Ший Пампалче» ден «Маринавт-влак» спектакльла гыч мурылан ойырымо. Тидын коклаштак Зоя Михайловна «Кырланур – луй модмо вер» проектым илышыш шыҥдарыме нерген рашемден ойлен. Тудо икмыняр ий шуйнаш тӱҥалеш. Тӱҥ шонымашыже – Купсола ялым Йыван Кырлам шарныме, турист-влак коштмо верыш савыраш. Верысе администрацийын еҥже-влаклан касын озаже тиде пашалан шке ешыж деч окса надырым кучыктыш.
Зоя Дудиналан кодшо ий мучаште «Марий Эл Республикын калык серызыже» пуымо чап лӱм тудын моткоч шуко шӧрынан возымо усталыкшым иктешлен, тыгак мер сомылым виктарымаште чолга улмыжым пеҥгыдемден ончыкта.