9 ноябрьыште М.Шкетан лӱмеш театрыште «йыргешке ӱстел» йыр мутланымаш эртен. Тудо олаште шочшо икшывым театрын йӧнжӧ дене ача-ава йылмым палаш кумылаҥдыме темылан пӧлеклалтын.
Тыгай мутланымашым лачшымак тыште эртарымын ик амалже – 20 ноябрьыште «Кум ака-шӱжар» марий йомакын премьерже. Йочалан марий йомакым шукертсек модмо огыл ыле. Ты гана театрын художественный вуйлатышыже В.Пектеев татар калык йомак негызеш шкенжын возымо пьесым рушла да марла шынден. Тидым паленак ыштыме: марла модмо сеансыш калыкым погаш йӧсырак лиеш. Но ондаксе семынак йогын почеш гына ияш тӱҥалына гын, марий йылмынан ӱмыржо эшеат кӱчыкемеш. Олаште марий еш шагал огыл ила. (Мыняржым кызыт эртыше перепись рашемда ынде). Но тушто у тукым рушаҥын кушкеш. Ача-аважын, коча-коважын йылмыжым палаш тудо кумылан лийже манын, мыланна мом ыштыман? Лач тыгай йодышым шындыме ыле погынышо-влак ончылан. Таче кечылан марий йылмым туныктымо шотышто сӱретым пеш сайын 14-ше школышто туныктышо Л.Никитина, 21-ше школын туныктышыжо О.Васенина, 29-ше йоча сад вуйлатыше С.Григорьева, республикысе образований да науко министерстве пашаеҥ Е.Тарасова почын пуэныт. А тудо куандарыше огыл. Мо оҥайже, марий йылмым туныктымо йодыш йоча дене огыл, эн ончычак ача-ава дене кылдалтын. Марий-влак ала-молан шочмо йылме урок йочан тунемме процессшым нелемда манын шонат. Кок йот йылме тидым ок ыште, а шочмо йылме — теве тыгай, тудын дене торашке от кай пуйто.
Марий мер каҥашым вуйлатыше Э.Александров Российысе национальный республиклаште шочмо йылмым тунемме да туныктымо йодышым сайын шымлен. Шукыштыжо сӱрет чылт ваштарешлыше. Тыгай регионлаште йылмым тунемме йодышым законодательно пеҥгыдемдыме, сандене ача-ава ден вуйлатыше коклаште «торгайымаш» ок кай. Мемнан республикыштат тудым парламент кӱкшытыш лукташ кӱлмо шотышто погынышо-влак кутырен келшышт. Мутланымашке ушнышо коклаште шукынжо СМИ-лаште ыштыше улыт ыле.
А 20 ноябрьыште марий йомакыш кӧ йочаж дене, кӧ уныкаж дене толеш гын, сай пример лиеш ыле, палемдыш Марий мер каҥаш вуйлатышын алмаштышыже В.Мочаев. Марий театр марий еш-влакын вашлийме вер лийшаш. Тиде темлымашым чыланат сайлан шотлышт.