Йӧратымашым нуно оксала огыт ужале

9 декабрьыште  театр калыклан эше ик у спектакльым темлыш. «Йӧратымашын акше» комедий марий драматург-влакын конкурсыш пурышо «Чачавий» пьесе негызеш шындалтын. Тудын авторжо – Василий Пектеев. Шкежак — режиссер- постановщик, художник-постановщик.

В.А.Пектеевын  пьесе дене ыштыме опытшо ондакат лийын. Шке жапыштыже Ю.Байгуза дене пырля  «Шӧртньӧ лудо», С.Чавайнын кӱчык произведенийже негызеш «Окса тул» пьесым возеныт.  Василий Александрович тыгак С.Чавайнын «Элнетшылан», А.Спиридоновын «Югорныжлан» сценарийым ыштен, нуным шкеак  театрыште шынден.

Тиде гана чылт угыч пьесым возаш кумылаҥын. Да теве ынде паша саскажым калыклан аклаш темлыш. Тиде спектакль тудын  усталыкшын кумда шӧрынан улмыжым почын пуа.  Декорацийым тудын  макетше гыч ыштыме.  Комедийыште йоҥгышо мурылан мутымат шкеак возен (семже Татаьяна Ямбердован).  А эше тӱшка сценыш   Национальный гимназийысе театр классыште тунемше-влакым пуртен. Тиде классым Василий Александрович шкеак поген да  специальность дене туныктымо пашам виктара. Нине ӱдыр-рвезе-влак тений 9 классым пытарат. Тиде спектакльыште модмо  нунылан кугу экзамен гаяк лийын.

А спектакль тачысе кечын ойыртемжым почын пуа. Еҥ-влак кокла гыч ала-кудыжо, пьесысе Бидон да тудын Салабара эргыже  гайже, оксала чыла налаш лиеш манын шонат. Но улыт яндар чонан, йӧратымашым шке шижмаш дене аклен моштышо-влак. Иван Янгелдовичым, Сасканайым, Виктор дн Таня-Чачавийым ты шотышто пример семын ончыкташ лиеш.  Йӧратымашым нуно оксала огыт ужале.

Поделиться ссылкой:

Top