19 февральыште М.Шкетан лӱмеш Марий драме театрын вӱдышӧ актрисыже, РФ-н сулло, РМЭ-н калык артисткыже Маргарита Медикован усталык касышкыже калык зал тич погынен ыле. Тидлан ӧраш нимолан, вет тудо шке усталыкше дене шукертак ончышын йӧратымашыжым да пагалымашыжым сулен. «Мыйын илышем – театр» манме вуймутшат тудлан тӱрыс келшен толеш. Маргарита Егоровна ынде 38 ий театрлан ӱшанлын служитла, тидым модмо шӱдӧ утла рольжо пеҥгыдемдаш полша.
Тиде кастене Марий Эл правительство вуйлатышын икымше алмаштышыже М.З.Васютин М.Медикован оҥышкыжо «За заслуги перед Марий Эл» орденын медальжым пижыктен. Ты кугу награде актрисым кугыжаныш кӱкшытыштӧ аклыме нерген ойла.
Сценыш саламлаш лекше-влакын ойлымыштым кӱчыкын кум мут дене тыге иктешлаш лиеш: «Йӧратена! Пагалена! Кугешнена!»
М.Медикован кажне усталык касше ойыртемалтшын эрта. Тиде гана актрисын программыжым Культура да искусство колледжыште тудын дене актер мастарлыклан да сценыште кутыраш тунемше мурызо-влак пойдарышт.
