«Икымше номеран артист»

Иван Смирнов бенефис

Россий Федерацийын сулло, Марий Эл Республикын калык артистше Иван Смирнов 9 октябрьыште «Йыван Кырла. Путевка в жизнь» спектакль дене бенефисым эртарыш. Тудым 60 ияш лӱмгечыжлан пӧлеклен.

Тиде кас саламлымаш гыч тӱҥалын. Марий Эл правительстве вуйлатышын икымше алмаштышыже М.Васютин И.Смирновлан «За заслуги перед Марий Эл» орденын медальжым кучыктен. Актер тиде наградым кечын тыршен ыштыме пашаж дене сулен.

Иван Смирнов

Иван Викентьевич М.Шкетан лӱмеш Марий драме театрыште 1987 ий гыч кӱрылтде пашам ышта. Тиде жапыште поян репертуарым поген, тӱрлӧ жанран спектакльыште шӱдӧ утла рольым модын. А бенефислан кызыт сценыште кайыше, актерын усталык корныштыжо келге паша семын палемдалт кодшо спектакльым налын. Вет тыште тӱнялан палыме марий айдемын – Йыван Кырлан — образшым чоҥен.

Иван Смирнов бенефис

Спектакль деч вара сценыш саламлаш толшо-влак кӱзеныт. Нунын коклаште республикысе театр вуйлатыше, СТД, У Торъял муниципальный районысо депутат-влак собраний, администраций лӱм дене саламлыше-влак лийыныт.  «Республикысе чыла театрлан Иван Смирнов — икымше номеран артист» — теве тыгай шонымаш йоҥгалтын нунын шомакыштышт. Вашешмутыштыжо Иван Викентьевич театрыште пашам пырля ыштыше чыла еҥлан, залыште шинчыше ончышо-влаклан кугу таум ойлен. Вет усталык паша – тӱшка паша, шкетын ала-могай сеҥымашке, кӱкшытыш шуаш ок лий. А ончышо деч посна театржат ок лий ыле.

Иван Смирновын таче кечылан кумылжо нӧлталтше, тудо у деч у рольым ышташ ямде. Тидлан мастарлыкшат, опытшат ситыше.

Поделиться ссылкой:

© Шкетан театр - 2020

Top