Фестивальым марий спектакль почын

14 ноябрьыште С.Пектеевын сценарийже почеш возымо да тудынак шындыме «Йыван Кырла. Путевка в жизнь» спектакльын эскизше дене национальный драматургий фестиваль почылтын.
Саламлыме мутым Марий Элын культур, печать да калык-влакын пашашт шотышто министрын алмаштышыже М.И.Матвеев, РФ СТД секретарь, РФ СТД-н Республик-влак Советшын председательже, Калмыкий Республикын Б.Басангов лӱмеш национальный драматический театржын художественный вуйлатышыже, режиссер Б.Н.Манджиев, М.Шкетан лӱмеш Марий кугыжаныш драме театрын художественный вуйлатышыже В.А.Пектеев ойленыт. Нуно палемденыт: Марий театрын чумырымо тиде фестиваль географийжым кумдаҥден, тудо финн-угор кышкар гыч лектын. Репертуарыш Калмык, Татар, Чуваш национальный театр-влакын спектакльыштым пуртымо. Тидыже мемнан ончышылан марий театр-влакын пашаштым вес театр-влак дене таҥастарен ончалаш, аклаш йӧным пуа.
«Йыван Кырла. Путевка в жизнь» спектакль деч вара каҥашымаш эртен. У йӧн, стиль дене шындыме спектакль жаплан келшыше, палемденыт критик ден ончышо-влак. Тудо марий калыкын, совет калыкын тичмаш налмаште эртыме корныж нерген веле огыл, тудо тачысе кече нерген каласкалыше паша.
Фестиваль умбакыже пашам ышта. Тудын афишыж дене сайтыште палыме лияш темлена.