Шкетан лӱмеш театрна сылне премьер — «Ший Пампалче» мюзикл — дене куандарыш. Вигак шоналтышым, молан йоча-влакым намиен омыл? Тачысе икшыве-влаклан поро ден осалын ойыртемыштым марий йомаклан эҥертен, «нугыдо» чия, жаплан келшыше спецэфект, марий семым уэмден йонгалтарыме гоч намиен шукташ утларак келшен толеш. Тидымак шотыш налыныт мюзиклым ямдылыше-влак. «Ший Пампалче» — еш дене ончаш йӧрышӧ спектакль.
Мюзикл мучко мый ик гана огыл йоча пагытыш пӧртыльым я марий йӱлаштына улшо ойыртемым эскерышым, йоча семынак воштылашат ыжым ӧр.
Сӱан йӱламак налаш. Мом ыштет ынде, Вӱдонат моторым йӧрата да йӱла почешак ӱдырым налнеже. Тудлан поян да юзо виян лияш шонышо-влак полшаш кумылаҥыт. Ший Пампалчын ачаже ик йоҥылышыжлан кӧра теве-теве ӱдыржым йомдара… Но тудлан жапыштыже пушеҥге-влак полшат. Вӱдонын сӱанже мыланем йоча годсекак пошкудо чочойын Вувер куван сӱанже нерген каласкалымыжым ушештарыш. Сӱанже пуйто пасу велым толешат, суртшо гоч эрта да пич коремыште йомеш. Йоча годымак ушеш сӱретлалт кодшо ты сӱаным пуйто мый кызыт сценыште ужым…
Спектакльыште калыкмутат, ойӧрат шижалте, сӱан такмак-влакат куштылгын йоҥгалтыт.
А ший товар — тиде ик эн тӱҥ образла чучо. Ик могырым, товар — паша ӱзгар. Тудын деч посна коҥга олташ пумат ямдылен от керт, пӧрт пурамат от ру, плотньык пашатат ок вораҥ. Вес могырым, тудо юзо виян, осалым чактара, вет эсогыл отышто кумалтыш годым осалым лачак товар ден кӱзым вашла пералтен поктат. А шийже! Марий калык тудым эреак аклен. Ший — тиде чон яндарлык, арулык, волгыдылык… Ший ожно шӧртньӧ дечат шерге лийын.
Палена, илыш йомак огыл. Ший товар кажне еҥын шке кидыштыже. Икте тудым поро пашалан кучылтеш, весе осалым ышта, да садак… сеҥалтеш.
Национальный драме театр-влак шагал годым мюзиклым шындат. А ятыр артистын мурен моштымо мастарлыкшылан кӧра тиде жанр Шкетан лӱмеш театрын репертуаржым пойдарыш.
Саламлем, йолташ-влак!
Светлана Пехметова.