М.Шкетан лӱмеш Марий драме театр ончышо-влакым эше ик у паша дене куандарен. Тиде З. Долгован пьесыж почеш В. Домрачевын шындыме «Эрла ял пайрем» спектакль ыле. Тудо 27, 28 февральыште калыкым залыш тич поген.
Тиде паша театрын кугурак ийготан ончышыжлан поснак лишыл лийшаш. Вет шочмо ял гыч кугурак олаш але вес кундемыш илаш куснышо шукын улыт. Ала-кудыжын шочмо суртыштыжо эше кастене тул чукталтеш гын, весыжын ялжат кодын огыл. Тиде спектакль ончышым эртыше пагытыш пӧртылта, чоным пӱтырал луктеш.
А ялеш кодшыжо шке илышышт дене илат. Пӱрымаш корно кажныжын савыртышан лийын. Пошкудо-влак дене вашлиймашлан ямдылалтме годым нунын чонышт мыняр гынат эрыкым налеш, эн лишыл еҥыштлан ӱмыр мучко шылтен ашныме кумылышьым рудат.
Тиде у пашан эше ик ойыртемже уло. Пьесын авторжо, режиссер-постановщик да рольым модшо ятыр артистше (Маргарита Медикова, Иван Смирнов, Антонина Антонова, Светлана Гладышева) ГИТИС-ым пырля тунем пытарыше улыт. Ӱмыр мучко театрлан ӱшанле лийын кодшо нине еҥ-влак теве тыгай тӱшка паша дене куандарышт.