Эн сай пьесылан конкурсым иктешлыме

Тений идалык тӱҥалтыште Марий Элын культур, печать да калык-влакын пашашт шотышто министерствыже да республикысе кум марий театр эн сай пьесылан конкурсым увертареныт ыле. 5 декабрьыште тудын сеҥышыже-влак пале лийыныт.

Конкурсыш чылаже 12 пьесе пурен. Жанр шотышто нуно тӱрлӧ лийыныт. Комедийым гына налаш гын, нуно ойыртемалтше лийыныт: «шӱлыкан», «лирический», «музыкальный», «детектив сынан». Кум пьесым автор драме кышкарыш шынден.

Тений жюри член-влаклан паша утларак логалын. Чыла латкок пьесым эн ончычак шке коклаште радамлен каҥашыме. А вара автор-влаклан семинар-лабораторийым эртарыме. Теве тидыже эн шерге манын шотлыман. Критик-эксперт-шамыч возышо еҥлан кушто кӱчык-кужум ончыктеныт, пьесым саемдыме шотышто ой-каҥашым пуэныт. Жюрим МарГУ-н преподавательже, филологий науко кандидат Г.Н.Бояринова вуйлатен. Тыште тыгак театровед Н.Кульбаева, культурологий доктор Г.Шкалина, филологий науко кандидат М.Н.Кузнецова, литературышто сайын палыме поэт-влак Г.Л.Сабанцев, А.П.Иванова, Г.П.Пирогов пашам ыштеныт. Каласыман, автор-влак шке пашаштым алмашлӱм (псевдоним) дене тидлан лӱмын почмо электрон почтыш колтеныт (жюрин секретарьже деч моло тушко иктат пурен кертын огыл). Жюри член-влакат южыжын чын лӱмжым сцене гыч увертарыме годым веле пален налыныт, а ик еҥ тугак палыдыме кодаш кумылан лийын. Весе. Кажне пьесым ныл лончо (критерий) дене аклыме, кажне лончыштыжо эн шукыжо 10 баллым погаш лийын. Кажне эксперт посна шке баллжым шынден (тидыжым тайно йӱклымӧ дене иктӧр аклыман).

Тыге, 5 декабрьыште М.Шкетан лӱмеш Марий драме театрын сценыж гоч сеҥыше да конкурсыш ушнышо-влакын лӱмыштым увертарыме, диплом дене палемдыме.

I степенян диплом дене Анатолий Мокеев палемдалтын («Ой, Мичу! Ох, Зина!» драме);
II степенян диплом дене В.Григорьев палемдалтын («Ӱмбакем ӧпкелен ит ончо» шӱлыкан комедий);
III степенян дипломын авторжо пале огыл («Ик ялыште кум сӱан» музыкальный комедий.

Нине кум пашам М.Шкетан лӱмеш да Марий самырык театр-влак сценыш лукташ ямдылаш тӱҥалыт.

Поделиться ссылкой:

© Шкетан театр - 2022

Top