Марий Эл Республикысе тӱвыра, печать да калык-влакын пашашт шотышто министерстве, М.Шкетан лӱмеш Марий национальный драме театр, Марий самырык театр да Курыкмарий драме театр марий йылме дене возымо эн сай пьесылан конкурсым увертарат.
Конкурсын тӱҥ шонымашыже:
Марий профессиональный театрлаште, любительский коллективлаште шындаш келшыше келге содержаниян сылнымутан произведенийым кычалаш.
Конкурсым эртарыме жап:
Конкурсыш пашам 2024 ий 15 сентябрь марте колтен шуктыман.
Иктешлымаш 2024 ий 1 декабрь марте ышталтеш.
Конкурсын условийже:
Конкурсыш темлыме пьесе оригинальный, тидын марте театрыште шындалтдыме лийшаш; тыгак марий автор-влакын произведенийышт, фольклор материал негызеш возымо сценарийым темлаш лиеш. >> Положенийым налаш
Пьесым алмашлӱм (псевдоним) дене колтыман.
Ик автор икмыняр произведенийым (кажныжым посна алмашлӱм дене) темлен кертеш.
Темлыме пашам MS Word (але вес текст-редактор) файл дене тыгай адрес дене колтыман: shketanteatr@gmail.com
Текстым Times New Roman шрифт дене погыман, 12 размер, корно кокласе 1,5 интервал дене 50 лаштык деч шуко лийшаш огыл;
Темлыме паша тӱҥалтыштак алмашлӱм, пьесым возымо ий, тудын лӱмжӧ, жанр, могай ийготан лудшылан (ончышылан) темлалтмыже, кӱчык аннотаций лийшаш.
РАШЕМДЫМАШ. Ик лаштык деч шуко огыл кугытан аннотацийыште пьесын тӱҥ шонымашыжым, театрыште шындаш темлыме амалым ончыктыман.
Конкурсыш темлыме паша РФ законодательствын йодмыжлан келшен толшаш. Конкурс пашаште тамакым шупшмо сцене, нормативный огыл лексике лийшаш огыл. Наркотический средствам, психотропный веществам, социальный, расовый, национальный але религий могырым икте-весе деке ужмышудымашым, келшыдымашым пропагандироватлаш да агитироватлаш чаралтеш, экстремизм дене кылдалтше пашам, экстремизм шӱлышан материалым, порнографийым пропагандироватлаш ок лий.
Авторын алмашлӱман пьесыжым (а конкурс иктешлалтмек, авторын шке лӱмжӧ дене) М.Шкетан лӱмеш Марий национальный драме театрын сайтыштыже (www.shketan.ru) почмо Интернет-библиотекыш кеч-кӧ лудын да шке шонымашыжым возен кертеш.
Сеҥышым палемдыме да кумылаҥдыме радам.
Конкурсыш пурышо пьесе-влакым экспертный жюри (тудын радамыште драматургийыште специалист да марий сылнымутышто кугу кӱкшытыш шушо еҥ-влак улыт) лудеш да акла.
Темлыме паша-влак М.Шкетан лӱмеш Марий национальный драме театрын сайтыштыже (www.shketan.ru) почмо Интернет-библиотекыш вераҥдалтыт. Тушко пурен, пьесым кеч-кӧат лудын да шкенжын аклыме шомакшым возен кертеш.
Жюрин аклымыж деч вара сеҥышыш лекше пьесе-влакын авторыштлан кумылаҥдыме тыгай приз-влак палемдалтыт:
1-ше вер — 25 тӱжем теҥге;
2-шо вер – 20 тӱжем тенге;
3-шо вер – 15 тӱжем тенге.
Конкурсыш пурышо эн сай пьесе-влакым театр-влак сценыште шындаш налыт. Кажне театр мынярым шона, тунарым налын кертеш. Гонорарын кугытшо автор ден театрын дирекцийже коклаште ыштыме договорышто палемдалтеш.
Кодшо моло пьесе драматургий лабораторий ден семинарлаште лончылаш, «Ончыко», «У сем» сылнымутан журналлаште савыкташ темлалтыт. Автор дене кытарен келшымеке, тыгак М.Шкетан лӱмеш Марий национальный драме театрын сайтыштыже (www.shketan.ru) Интернет-библиотекыште аралалт кодеш, тудын дене марий театр искусствым йӧратыше, марий любительский театр коллектив-влак палыме лийын кертыт.