Драматург-влаклан семинар

11-18 ноябрьыште М.Шкетан лӱмеш драме театрыште национальный драматургий фестиваль эрта. Тудын кышкарыштыже драматург-влаклан семинар-лабораторий пашам ышта.
Икымше кок кечын ойырен налме драматургий материалым автор, театровед да режиссер пырля лончыленыт. Тидлан лӱмын критик-влакым ӱжмӧ. Павел Подкладов Москва гыч, Дина Давлетшина Уфа гыч толыныт. А умбакыже режиссер-влак Сергей Васин чуваш драматург Владислав Николаевын «Эс ман чунра» («Во мне душа Пихампара»), Ольга Искоскина Светлана Вассанован «Пашкыдем-пышкыдем», Дмитрий Королев Дина Кораблеван «Йӧратымаш сем», Роман Алексеев Валерий Абукаевын «Сулык пыжаш» пьесышт почеш ик ужашым кӱчык жапыште модын ончыкташ ямдылат.
Тушто Шкетан театрын да руш драмтеатрын артистше-влак модыт. Нунын пашаштым фестиваль кайыме жапыште ужаш йӧн лиеш.
Каласаш кӱлеш, каҥашымаш пеш шокшын эртен. Автор-влаклан тиде чынжымак усталык лабораторий лийын, нуно критик-влаклан кугун ойленыт.
Фестиваль 14 ноябрьыште Степан Пектеевын сценарийже почеш шкенжынак шындыме «Йыван Кырла. Путевка в жизнь» спектакль дене почылтеш. 10 ноябрьыште тудым изирак аудиторийлан ончаш темлыме ыле. Ончышо да критик-влакат тиде постановкылан кӱкшӧ акым пуэныт.
Фестивальын репертуарышкыже Калмыкий, Чуваший, Татарстан ден Марий Элысе национальный театр-влакын спектакльыштым пуртымо.
Фестиваль РМЭ-н культур, печать да калык-влакын пашашт шотышто министерствыжын, РФ культур министерствын да «Ульяновск – культурная столица» фондын полшымышт дене эртаралтеш.