19 декабрьыште М.Шкетан лӱмеш Марий драме театрын актрисыже Светлана Филиппова шке бенефисышкыже зал тич калыкым поген ыле. Тудым театрыште ыштымыжлан 25, шочмыжлан 45 ий теммылан пӧлеклен.
Артистын репертуарже таче тӱрлӧ сынан рольлан поян. А усталык касшым «Йӧратымаш да кӧгӧрчен-влак» спектакль дене эртараш кумылаҥын. Молан? «2024 ий Россий мучко Еш идалык семын увертаралтын ыле. Тудо ынде мучашке лишемеш. Ты спектакль таче кечылан лач келшен толеш», — манеш шкеже.
Бенефисын озаже шкежат, моло артист-влакат ты кастене чоным пыштен модыч. Нунылан ончышо-влакат почылтшо кумылышт дене полшышт.
А спектакль деч вара Светлана Филипповам саламлаш лекше-влак шуко шокшо мутым ойлышт. Театрын директоржо Э. Юзыкайн РМЭ-н культур, печать да калык-влакын пашашт шотышто министерствын, Марий Эл Кугыжаныш Погын председательын алмаштышыже Л. Яковлева Кугыжаныш Погынын Чаптаныкшым кучыктыш. Саламлымашке ушненыт СТД, республикысе культур пашаеҥ-влак реском, Волжский муниципальный район вуйлатыше, Шарача школ коллектив, республикысе театр вуйлатыше да шуко-шуко моло еҥ. Тиде кас калыкын ты чолга актрисын модмыжым йӧратымыжым эше ик гана пеҥгыдемдыш.
