Черетан тургымым мучашлыме

шкетан театр

У спектакльлан да фестивальлан поян лийын

17 июньышто А.Мокеевын пьесыж почеш шындыме «Ой, Мичу!.. Ох, Зина!..» спектакль дене М.Шкетан лӱмеш Марий драме театр шкенжын 103-шо тургымжым мучашлыш.

Моло ийла дене таҥастарымаште, тений тудо кужунрак шуйныш. Тидлан икмыняр амал ыле.  Май кыдалне кӱшнӧ ончыктымо спектакльын премьерже эртыш. А 23-29 майыште Финн-угор калык-влакын театрыштын XIV тӱнямбал «Майатул» фестиваль эртаралте. Кумшо амал – тургымым петырыме сомылым регион-влак кокласе «Пеледыш пайрем» деке лишемдыме, вес кундемла гыч толшо родына-влаклан театр полатыш толынак спектакльым ончаш йӧным ышташ шонымо.

Иктешлен ончалаш гын, тургым тӱрлӧ  спектакльлан, моло мероприятийлан поян лийын.  Тиде пагытыште куд у спектакльым сценыш лукмо. Нунын коклаште классикыжат, кызытсе пьесыжат, комедийжат, драмыжат, йомакшат,  кусарымыжат, марий произведенийжат лийыныт. Пытартышыже – «Ой, Мичу!.. Ох, Зина!..» драме марий драматургий конкурсышто икымше верым налын ыле. Тудым  ноябрь тылзыште иктешлыме.

Театр ятыр фестивальыште шке мастарлыкшым терген. Эн лектышанже, мутат уке, «Майатул» лийын.  Жюри мемнан эпос почеш шындыме «Югорно» спектакльнам эн кугу премий – Гран-при – дене палемден. Тудым театрын художественный вуйлатышыже В.А.Пектеев шынден. Каласыман, тений финно-угор театр-влак пеш виян пашам конденыт ыле.

Тургымым мучашлыме кастене коллективын сеҥымашыже-влакым радамлен лекме, ойыртемалтше-влаклан Дипломым, Тауштымашан серышым, пӧлекым кучыктымо.

Тыгак «Майатул» фестиваль дене кылдалтше мероприятийлашке ушнышо коллектив ден нунын вуйлатышыштым, СМИ пашаеҥ-влакым палемдыме.

Пӧлекым погымаште «Геникс» НПФ ООО, «Плес- Трейд» ООО, «Йошкар-Олинский мясокомбинат» АО да молат полшеныт.

Ю.П.Русанов лӱмеш премий

Тений Ю.П. Русанов лӱмеш усталык премийын положенийжым уэш ончен лекме.  Юрий Петрович Русанов марий журналистикыште келге кышам коден, ятыр жап М.Шкетан лӱмеш Марий драме театрын директоржо лийын, Марий национальный конгрессым вуйлатен.

Эксперт Совет  театр искусствышто да журналистикыште поснак кугу кӱкшытыш шушо еҥ-влаклан ий еда театр тургымым мучашлыме годым премийым кучыкташ палемден. Премийын учредительже-влак теве кӧмыт улыт: Воронцов В.П., Воронцов С.П., Ильин А.М., Давлетшин Р.Х., Яковлева Л.Н.

Тений Ю.П.Русанов премийым М.Шкетан лӱмеш Марий драме театрын актёржо Иван Соловьев ден «Марий Эл» газетын тӱҥ редакторжын алмашыштыжлан Светлана Пехметовалан кучыктымо.

Поделиться ссылкой:

Top