5 сентябрьыште Йошкар-Олаште Вашский уремысе 7-ше №-ан пӧрт пырдыжеш РСФСР-ын да МАССР-ын калык артистше Виктор Дмитриевич Бурлаковым шарныме лӱмеш оҥам сакыме. Тиде пӧртыштӧ тудо 1982 гыч 1996 ий марте илен.
Виктор Бурлаков 1927 ий 22 сентябрьыште Советский район Лайсола ялыште шочын. Кужмарий школ деч вара 1945-1947 ийлаште театр пеленсе студийыште тунемын. Тудым тунемын пытарымеке вигак Марий кугыжаныш драматический театрын труппышкыжо ушнен. 1949-1953 ийлаште Виктор Дмитриевич 1-ше №-ан спецРУ-што воспитательлан ыштен, Военно-морской флотышто срочный службым эртен. Вара театрыш пӧртылын.
Виктор Бурлаковын пашаже пеш кӱкшын аклалтын: 1960 ийыште тудлан «Марий АССР-ын сулло артистше», 1969 ийыште «Марий АССр-ын калык артистше», 1978 ийыште РСФСР-ын сулло да 1985 ийыште РСФСР-ын калык артистше лӱмым пуэныт. Но кугу артистлан эн кугу ак – калыкын чынже денак йӧратымыже.
А калык тудым йӧратен веле огыл, кызытат йӧрата. Шарнымаш оҥам сакыме годым тиде поснак шижалте. Мероприятийыш моткоч шукын пыгыненыт: Марий Элын тӱвыра, печать да национальность паша шотышто министрже М.З.Васютин, оньыжа А.Н.Иванов, Шкетан лӱмеш театрын директоржо Ю.П.Русанов, тӱҥ режиссёржо Р.Ю.Алексеев, ятыр артистше, Бурлаковын пелашыже Валентина Васильевна, театрын ончычсо режиссёржо С.И.Иванов, Марий Элын сулло артисткыже Р.М.Данилова да молат толыныт – чылаже витле наре палыме да пагалыме еҥ. Тудым шарнен, шукын ойлышт. Иктышт Виктор Дмитриевич дене пырля пашам ыштеныт, весышт тудын деч кугу опытым налыныт, кумшыштлан эн лишыл йолташ лийын, а кӧ гын йӧратыме артистшым пагален толын.
Тушто тыге йоҥгалте: театр гастроль дене иктаж-куш каен гын, «Йошкар-Ола гыч Бурлаков толеш» манмат ситен, тетла нимогай рекламе ок кӱл ыле: калык рӱж погынен. Кунам тудо канен, мален, кочкын, иктат ужын огыл, эре йол ӱмбалне лийын, иктым-весым кычалын, умылкален, тале организатор лийын. Пелашыжлан тудо сай марий лийын моштен. «Ме пырля 53 ий, ик тылзе да 17 кече иленна», – ойлыш Валентина Васильевна. Пелашыжым, кок икшывыжым да кандаш уныкажым артист чот йӧратен.
«Виктор Дмитриевич пеш мастар ыле. Йошкар-Оласе пӧртлаште сакыме тыгай Шарнымаш оҥа-влак марий калыкнан шуко чолга еҥан улмыжым ончыкта. Илен-толын, ала кажне пӧртыштӧ тыгай оҥа кечаш тӱҥалеш», – манын Марий Элын тӱвыра, печать да национальность паша шотышто министрже Михиал Зиновьевич Васютин.
Игорь Попов. «Кугарня», 2012 ий 28 сентябрь