21 октябрьыште марий тӱня Марий театр искусствын аксакалже, МАССР-ын сулло артистше Юрий Валерьевич Алексеевым пытартыш корныш ужатен.
Тудо 1949 ий 26 августышто Морко районысо Кугу Шоръялыште шочын. Морко кыдалаш школым тунем пытарыме деч вара ик жап Маргостеатрыште вспомогательный составыште, курчак театрыште модын. 1968-1969 ийлаште Республикысе культпросветучилищыште тунемын.
1969 ийыште Луначарский лӱмеш Театральный искусство институтыш пурен. Тиде кокымшо марий студий лийын. Дипломым налмеке, Совет Армий радамыште служитлен. 1974 ийыште М.Шкетан лӱмеш Маргостеатрын труппышкыжо ушнен.
Икымше рольжо-влакак самырык артистын образыш келгын пурен кертмыже нерген палдареныт. Тыгай лийыныт «Комиссарын чапше» спектакльыште Кужнуровын, «Морко семыште» Стапан Микалын рольышт. «Ачийжат-авийжат» драмыште Мачук, «Мӱкш отарыште» Мичи, «Айвикаште» Янгелде, «Оптимистический трагедийыште» Алексей, «Король Лирыште» Эдгар… Ончышын чонешыже кодшо эше шуко тыгай рольым палемдаш лиеш ыле. Тудын модмыжо калыкым ӱшандарен. Тудо кугурак тукым артист-влак деч эн сайжылан тунемын да тидым сценыш луктын.
1989 ийыште Юрий Алексеевлан «МАССР-ын сулло артистше» почетан лӱмым пуымо.
1991 ийыште угыч почылтшо Марий самырык театрын директоржылан шогалтат. Идалык гыч Республикысе курчак театрым вуйлаташ тӱҥалеш.
1993 ийыште Марий Эл Республикысе Правительствыш культур да искусство йодыш шотышто консультантлан налыт.
Но тидын годымат тудо сцене деч йӧршешлан огеш кораҥ, Самырык театрыште тӱрлӧ рольым модеш. Тыгай улыт «Айвика» спектакльыште Озамбай, «Эрге» драмыште Никита Сапаев, «Ӧртӧмӧ онышто» Ӧртӧмӧ да молат.
Тыгак Культур да искусство колледжысе театр отделенийыште тунемше-влакым тӱрлӧ дисциплине дене туныкта.
2010 ийыште уэш М.Шкетан лӱмеш Марий национальный драме театрыш пӧртылеш. Ийготшылан да мастарлыкшылан келшыше шуко образым ышта. Кугу ма але изи роль, тудо кажнышкыже чонжым пышта, спектакль мучко шке геройжын илышыж дене илен лектеш. Садланак ик гана веле огыл «Театральный Йошкар-Ола» фестивальыште тӱрлӧ номинацийыште Йыван Кырла лӱмеш театр премийын лауреатше лийын.
Пытартыш ийлаште шукыж годым Юрий Валерьевичлан кугу ийготан мудреч еҥын образшым модаш ӱшаненыт. Да спектакльыште веле огыл, кинопроектлаштат. «Евсеев. Признание ценою в жизнь» фильм деч вара Денис Шаблийын «Чоткар» фильмыштыже модын. А тений шыжым МЭТР телеканал «Парым» фильмым сниматлен. Туштат Юрий Валерьевичын рольжо уло. Чаманен каласаш логалеш, тиде пытартыш пашаже лийын.
Марий театр искусство эше ик чапле артистше деч посна кодо. Юрий Алексеев мемнан чонышто да ушышто чыным йӧратыше, шке шонымыжым лӱдде тура ойлен кертше, кугу кӧргӧ виян, моткочак поро айдеме семын илаш тӱҥалеш.