Актрисын эше ик у пашаже

М.Шкетан лӱмеш театрын чытамсыр чонан актрисыже, РФ-н сулло, РМЭ-н калык артисткыже Маргарита Медикова 55 ияш лӱмгечыже вашеш эше ик паша дене ӧрыктарыш: изи сценыш «Без слез не взглянешь» моноспектакльым лукто. Мария Апраксинан пьесыж дене Маргарита Егоровна шкежак режиссер семынат пашам ыштен. Актрисе ик шагат жап чылт ваштарешыжак, метр-кокыт коклаште шинчыше еҥын тӱткышыжым шке ӱмбалныже пеҥгдын куча.
Спектакльын сюжетше проста. Сулен налме канышыш лекше Маруся ончыч ыштыме паша верыштыже погымо Илалше-влаклан пӧлеклалтше пайрем гыч пӧртылеш. Да тушто мо лийме нерген каласкала. Тиде жапыштак пырдыж гоч илыше пошкудыжо-влак дене «мутлана», нунын нерген мом шонымыжым шылтыде ойла. Омса вес веке погынышо самырык-влак денат вурседылын шукта… Ийготым поген, шкет кодшо ӱдырамашын шке илышыжым кочо мыскара гоч ончалаш тыршымыжым М.Медикова ӱшандарышын ончыкта.
— Тиде пьесе мылам моткочак келшен, санденак тудын дене пашам шке гыч тӱҥалынам, — ойла актрисе.- Сценыште пеш куанен модам.
Тиде пашам «Йошкар-Ола театральный -2018» фестиваль жапыште критик-влак кӱкшын акленыт.
Тиде спектакльым 24 апрельыште театрын изи сценыштыже ончаш йӧн лиеш. 18.30 шагатлан тӱҥалеш.

Поделиться ссылкой:

Top